Yn iam briew ka Ri-war Mihngi ba shah kem u Sordar Wahkhen

Shillong, 5 Jymmang:
Ki Khlieh nongsyn shar jong ka thain Ri-War mihngi mynta ka sngi ki la pynlong ia ka jingialang ba kyrpang ha Pynursla ban ia kren halor ki kam ba iade bad ka jingshah sloit bor ki Rangbah Shnong, bad ha katei ka jingialang la wan ban ia shim bynta kumba 180 ngut ki Khlieh nongsyn shar ba kynthup ia ki Sordar, ki Rangbah shnong, Matabor, ki seng bhalang kum ka FKJGP, HYC bad la don ryngkat ruh u bah Erwin K Styiem Sutnga uba dei u Legal Adviser ka MIPRL.
Ha katei ka jingialang ki Khlieh nongsynshar ka thain Ri-War Mihngi ki la shim da ka rai ban pynlong da ka jingiam briew ha ka thain Ri-War baroh kawei na ka daw ka jingsha kem u sordar ka Wahkhen u bah Skhembor Khongjirem. Shuh shuh katei ka jingialang ka la rai ban kyrshan ia jing dawa ka MIPRIL ,ba ka KHADC kan pyntreikam da ka hukum ( executive order) bad ba ka sorkar jylla ka dei ban mynjur noh mardor ia ka Village Administartion Bill.
Katei ka jingialang ka la mynjur ba baroh ki khlieh nongsynshar kin ia tylli kawei na ka bynta ban pynneh pynsah ia ki riti dustur jong ka ri bad ka jait bynriew naba ki ong ba kane kam dei kaba ktah tang ia ki nongsynshar hynrei ka ktah lut ia baroh, na ka jing shah sloit noh ka iktiar ki nongsynshar shnong, ong ka kyrwoh na u bah Teiborlang Wankhar Secretary ka Synjuk Ki Khlieh nongsynshar Ri-War Mihngi.