“Yn ialap ia ka Gospel ka Hima”

AIS Suja

Yn ialap ia ka Gospel ka Hima ki bneng ha ki kynja bynriew baroh. “Te ia kane ka Gospel jong ka Hima (hima ki bneng), yn ialap ha ka pyrthei baroh ia ka ban long ka jingphla ha ki kynja bynriew baroh: ynda kumta kein kan jia kaba kut” Mathaios 24:14.

Ia ka Gospel u Jisu Khrist la ialap ha ka pyrthei hadien u Jisu Khrist. Ha shwa ia kane, u Jisu u la ong – “To leit sha ka pyrthei baroh bad to ialap ia ka Gospel ha ki bynriew baroh” Markos 16:15. Ha ki bynriew baroh, ka mut ym don pud (no limits). Ha uno uno u briew sha kano kano ka jaid bynriew kein ba kin iohsngew ia ka Gospel ka jingieit bah u Blei naduh bymjukut ia ki bynriew pyrthei, ia kano kano ka jaidbynriew kein ba kan iohsngew ia ka khubor ka jingpynim kaba da u Jisu Khrist.

Kumta hadien ka jingwan hiar u Mynsiem Bakhuid, u Petros ula sdang ban ialap ha ka sngi Pentecost. Ki kam ki Apostol 2:14. Nangto ter ter la ialap ia ka Gospel ka Hima u Blei naduh Jerusalem, Judia bad Samaria bad ha kiba kut ka pyrthei” Ki kam ki Apotol 1:8. Kane ka jingialap Gospel ka la iaid Ar-hajar snem tam mynta bad ka la jan ban kut artad. Bun ki la tip ki la iohsngew shaphang u Jisu Khrist bad ia ka Gospel lyngba bun ki lad ki lynti ban pyniohsngew sha kiba thrang ia ka Gospel u Jisu Khrist.

Ka jingialap Gospel ka la jan ban kut noh katkum ki dak ka por, bad ka la roi bha ruh shaduh ki kyndong ka pyrthei. U Blei u ong shaphang ka Gospel kumne: “Kan pyndep ia kata kaba nga sngewbha, kan roi ruh ha kaba nga la phah ia ka” Isaiah 55:11. Kumta ka la roi shisha. Mar ia roi, un pynkut kloi ruh ia ka. “Namar u Trai un pyniaid ia ka ktien (Gospel) ha ka khyndew (pyrthei), u da pyndep noh ia ka, bad u da pynkut noh kloi ia ka” Nong Rom 9:28-29.

Ka por ka la biang ba u Blei un pynkut noh kloi ia ka jingialap Gospel, bad sa tang katto katne, sha ki Ri ki hima pyrthei. Hynrei kaba phylla pat ka don hangne namar ba ha Israel yn ym pat lah dep ban ialap ia ka Gospel u Jisu Khrist tad haduh shwa ka jingwan u Jisu Khrist sha kane ka pyrthei. Ka daw ka long, ka jingbymngeit jong ki. Ong u Jisu – “Naba shisha Nga ong ha phi, ba phin ym pat lah dep ia ki shnong ki Israel – tad ynda un wan u khun u briew” (ka mut tad ynda u Jisu un wan pat, yn ym pat lah dep ban ialap Gospel ha ki Israel. Mathaios 10:23. Balei ka jia kumta? Ka ktien u Blei ka batai kumne: “Ha khmih ia me LA KYRTENG JIW, bad me shaniah ha kata ka hukum, bad me sngew sarong ha u Blei bad me tip ia ka mon jong u ……. Me (Israel) sngewskhem ba me long u nongialam lynti jong kiba matlah, ka jingshai kaba ha ka jingdum … Nong Rom 2:17.

Phi i ki Jiw (Israel) ki shaniah ha ka hukum u Moses bad ki sngewsarong ha u Blei, bad ym ha u khun u Blei, u Jisu Khrist. Ki kyntait ia u Jisu Khrist bad ia ka Gospel ka Jingpynim ei. kumta ki la long kiba mane Blei katkum ka hukum bad ki la long ki nongialam ba matlah ia kiba matlah. Kumta ki Israel ki la iaid matlah haduh mynta. Ong u Jisu – “Lada ka jingshai kaba ha me, ka long kaba dum, kata ka ba dum kaba katno?” Mathaios 6:23. Kumta ki Israel haduh mynta ki shai ha kaba dum, khlem u Jisu Khrist.

Kiba bun bah na ki Jiw ha ri Israel kim mon, kim ngeit ha kata ka kyrteng u Jisu Khrist. Lehse kiba ju poi ha Israel ki tip shaphang kata ka jingjia, ba ym bit da lei lei ban ialap ne pynsngew ha ki shaphang uta u Jisu, namar ki ong ki ithuh ia u Jisu ba u dei uei? Katba ka jingshisha kim ithuh ba u dei uta u Messiah jong ki uba ki ap khmih haduh mynta. Na kata ka daw u Jisu u pyrta hapdeng ki Jiw,”Phi ithuh te nga nga? bad phi tip nangno nga long? Ka daw ka long namar ba ki Jiw (Israel) ki ia ong – “Ia une ngi ithuh nangno u long” Ioanis 7:27-28. Katba ka jingshisha kim ithuh ia u Jisu ba u dei uei, bad kim lah ban pdiang ia u haduh mynta namar la tap matlah ia ki khmat jong ki.

Kumta ban ialap ia ka Gospel u Jisu Khrist ha ki Jiw ha Israel ka long kaba lehnohei tad haduh ba u Jisu un wan pat. Ka daw ka long ba ki sngewstad ha la ka jingsngew bad ki shu iaid matlah ha ka jingngeit niam jong ki katkum ka rukom ki kpa tymmen jong ki hyndai.

U Blei u long uba dap da ka jingieit. U Blei u long ka jingieit, hynrei teng teng u bitar ruh na ka daw ka jinglong ki briew hi. U la bitar jur ruh halor ki Israel, hynrei u kynmaw pat ia ka Jutang hapdeng u Abraham na ka bynta ka jaidbynriew Israel bad u la kular ruh ban pyndep ia ka jingpynim pat halor ki Israel baroh. Bad ia kata u la buh ha ka jingmut jong u hi ha ki por ki ban dang wan.

U Blei u ong – “Nga long u Blei, ym don uwei pat. Nga long u Blei ym don uba kat nga”. “Nga la kren ngan pyndep ruh ia ka: Nga la thmu ngan leh ruh ia kata” Isaiah 46:8-11.

Kumta, u Blei un sa pyndep ia ka kular halor ki Israel, kata ba yn pynim ia ki Israel baroh da kajuh ka jingpynim kumba la pynim ia ki Jentil ha ka por kaba khadduh eh. Watla mynta kim pdiang ia ka jingialap Gospel halor jong ki ……. tad ynda ba kata ka jingdap jong ki Jentil (bym dei Jew) kan da ioh wan hapoh, ynda kumta te, YN PYNIM IA KI ISRAEL baroh, kumba la thoh: U Nongpyllait un wan mih noh na Seion (Jerusalem) bad un pynphai noh ia ka jingbym riewblei na u Jakob (na Israel): KANE KA LONG KA JUTANG JONG NGA HA KI, YNDA NGAN KIT NOH IA KI POP JONG KI, shaphang ka GOSPEL KI LONG KI NONGSHUN na ka bynta jong phi, hynrei kata ka Jingjeid (election), ki long ba la ieit ia ki ……. Kata ka jingkhot u Blei ka long ba khlem jingkylla bamut, namar ma phi ruh mynno mynno phi la ju long ki bym kohnguh ia u Blei, hynrei mynta phi la ioh jingisynei, da kata ka jinglehisynei, da kata ka jingbymkohnguh jong ki (jong ki Israel kein) ……. da kata ka jinglehisynei kaba sha phi, yn ioh leh isynei ia ki ruh (ia ki Israel)”. Sha ki Nong Rom 11:25-31.

Ka mut hangne, kan poi ka por ba u Blei un pynim pat ia ki Israel, da ka jingisynei jong u pat ia ki. Kumba u la isynei ia nga ia phi bad ha kita kiba ngeit baroh kein, da kata ka jingpynim ei kaba da u Jisu Khrist u Trai.

Kumta, ia ki Israel yn pynim khadduh ia wai. Kata ruh ym da ka jingialap Gospel ha ki da ki briew hynrei da ka jingaiei u Blei ia ka jingpynim halor jong ki, tad haduh kata ka sngi ba kin iohsngew ia ka Gospel u Jisu ba yn sa ialap da ki 3 ngut ki angel, lym kumta, kin ym ngeit. Ka ktien u Blei ka ong – “Bad nga la iohi (ong u Ioanis Nongiathuhlypa), uwei pat u angel uba her hapdeng ka bneng, UBA DON KA GOSPEL BYMJUKUT ……. u ong da – To sheptieng ia u Blei, to ai ka burom ha u: naba la wan ka por ka jingbishar jong u …….” Jingpynpaw 14:6-7.

Dei ha kata ka por kein ki ngeit bad yn pynim ia ki. Dei halor kane ka bynta ba u Jisu u la ong – “BA PHIN YM PAT LAH DEP IA KI SHNONG KI ISRAEL, tad ynda un wan pat u Trai Jisu” Mathaios 10:23.

Kumta ka jingialap Gospel kaba mynta ka la jan ban dep noh. Lehse sa tang katto katne kaba khyndiat eh”. Ynda kumta, kan jia kaba kut” Mathaios 24:14.

Ha kane ka pyrthei science Technology te uei shuh u bym sngew ia ka kyrteng Jisu? Uei shuh u bym tip kaei ka Gospel? Namar u Daniel u la dep iathuhlypa lah slem bah u ong – “Ka jingtip kan roi haduh bakut kita ki sngi” Daniel 12:4.

“Uta uba ngeit ha u, yn ym pynrem. Hynrei u bymngeit, u la rem lypa” Ioianis 3:18.