Yn iakynduh MR ki Syiem

Shillong,2 Risaw:
Ka Dorbar Grand Council of Chiefs of Meghalaya kaba kynthup ia Ka Dorbar Ki Khlieh Nongsynshar Ka Ri Hyn niewtrep, Federation of Khasi States, Ka Dorbar Ki Dolloi, Ki Sirdarship ha ka jingiakynduh kaba kyrkieh jong ka mynta ka sngi ka la rai ban leit ia kynduh ia u Myntri Rangbah ka jylla u Dr.Mukul Sangma lashai ka sngi ka 3 tarik u risaw halor ka shithi ba ki ioh pdiang na ka Ministry of Home Affairs, New Delhi.
Lah ban kdew ba ka Dorbar ki Khlieh nong synshar ki la lum ia ka jingialang ba kyrkieh bad ki la shim rai ban leit ia kynduh ia u Myntri Rangbah ka jylla halor ki saw tylli ki shithi ba ki la ioh pdiang na ka sorkar pdeng kata ka shithi na ka Ministry of Home Affairs, Sorkar India, kaba D.O. No. 9./10/2012 dated 18 July 2012, sha u Chief Secretary, Meghalaya, kaba pan jingmut halor ka Memorandum ba la phah da ka Dorbar sha ki bor Sorkar India ha u June 2012 , Ka KHADC Village Administration Bill 2013- Ka jingpynbeit thymmai (Amendment) Sixth Schedule –Constitution Ri India bad ka Rai ka Dorbar 4 tarik June 2013, bad ban kyntu ia ki bor KHADC ban pynjari kyrkieh ia ka AIN bad RULE na ka bynta ki DORBAR KUR ne SENG KUR), kumjuh ruh ban ia kren halor ka jinglong ka suk ka sain hapoh ka jylla kaba la mih na ka jingiakhih jong ki shiphew tylli ki Seng Bhalang.
Ka Dorbar ka la rai ban ia kynduh ruh ia u Bah Pynshngain N Syiem, MLA, MDC, CEM, KHADC bad ia ki dkhot jong ka Select Committee KHADC ban ia kren halor ka ain KHADC Village Administration Bill 2013 ba la tyrwa da ki bor KHADC.Ha ka juh ka por ka Dorbar ki Khlieh Nongsynshar ka la rai ban kyntu ia baroh ki 3367 tylli ki jait Khasi bad Pnar (katkum ka census 1981 lyngba ka kot i Bah Spiton Kharakor) ban lum Dorbar Kur ne Seng Kur kyrkieh ban pynbna (notify) ia ka kyrteng jong kiba la ioh bor ban ai ia ka No-Objection Certificate (NOC), kynthup ka jaka treikam (office) jong ka Dorbar Kur ne Seng Kur, bad ban pyntip sha ki bor KHADC bad bor Deputy Commissioner khnang ba ka nym don kano kano ka jingbakla ha kaba ai NOC na ka bynta ki paidbah ha kaba iadei bad ka jingpan Schedule Certificate (ST) na ka office DC.
Ha kaba iadei bad ka jinglong ka suk ka sain hapoh ka jylla, ka Dorbar Grand Council of Chiefs of Meghalaya ki la phah lyngba u nongmihkhmat jong ki u Dr Balajied S Syiem, uba la shah jied ban long u dkhot ha ka HLC Committee ban iakren bad ki Khlieh Nongsynshar shnong ki la pynpaw ruh khlem ka jingiatrei lang ki bor Dorbar Shnong, Syiemship, Lyngdohship, Sirdarship, Dolloiship, Wahadadar, bad Nokmaship kan long leh noh ei baroh ki jingthmu ban teh lakam ia ka jingwan rung kyrthep ki nongwei.