Yn iakynduh ki trai khyndew ha Nongstoin

Nongstoin, 09 Nailar :
Wat la ka NGT kan pyllait ia ka jingtih bad khaii dewiong kaba thym mai hadien ba la lut u dewiong u ba rim ruh sa kawei ka jingeh ia ki nongkhaii dewiong ha kane ka kynti kadei sa kawei pat ka hukum jong ka inng bishar ba don burom jong ka Meghalaya High Court kaba la pynmih myn ha ka 30tarik Jylliew 2015 kaba la khang ym tang ia ka jingtih dewiong hynrei ia baroh ki jingtih marpoh khyndew (Mining Activities) ha ka Jylla Meghalaya.
Kat kum ka kyrwoh na u Secretary HNLOCTPA u bah A.L. Syiem la ong ba ka Hima Nongstoin Land Owner Coal Trader & Producer Association HNLOCTPA, ha ka Executive Committee kaba la long dang shen ka la iatai sani bha ia kane ka kam bad hadien ba la iatai sani bha ia kane ka hukum ka la shim ia ka rai ban khot ia ka jingialang paidbah ban iashai halor kane ka hukum ha shwa ban shim ia kino kino ki rai kiba iadei bad kane nangne sha khmat.
Shh shuh u la ong ruh ba ka Association ka la shim ia ka rai ban pynlong ia ka jingialang, ha ka 13 tarik mynta u bnai bad ka jaka kan long hapoh iing dorbar hall Mawkhlam Nongpyndeng ha ka por 11 baje mynstep, kumta ka Association ka kyrpad ia ki paidbah kynthup ia ki nongkhaii dewiong, ki trai khyndew, ki nong niah kali, ki nongtrei dewiong, ki riew rangbah ki long kmie samla bad kiwei kiwei ba kin sngewbha ban wan khnang khnang ha katei ka sngi.
Ha katei ka sngi yn iakren ruh ia ki dawbah ba ktah iaka jinglong hok halor ka khyndew ka shyiap bad ka khaii ka pateng ha ka kam trei dewiong mawshun bad kiwei kiwei ki marpoh khyndew ia ka ba la khang da ka iing bishar National Green Tribunal (NGT) la shi snem tam mynta bad ia kaba la khang shuh shuh da ka Meghalaya High Court ha ka hokum jong ka kaba la mih mynha ka 30tarik Jyllew.