Yn iakynduh ki seng riewlum bad ki sengbhalang ia U President BJP

Shillong, 20 Iaiong: 
Ki seng riewlum bapher bapher bad ka NPP nalor ki sengbhalang bad ki nongialam niam  kin ioh ia ka lad ban iakynduh ia u president rangbah ka BJP u Amit  Shah ha ka jingwan jongu sha kane ka nongbah ka ban ong ha ka 22 tarik Iaiong.
Katkum ka prokram, ka UDP, ka HSPDP, ka KHNAM nalor ka NPP kin iakynduh ia u Amit Shah ha ka jong ka por jongki bad ka jingiakynduh kan long kumba shiteng kynta eiei.
Nalor ki seng sain pyrthei, ki nongialam sengbhalang, kum ka KSU, FKJGP, SSSS, CSWO bad kiwei kin ioh ia ka lad ban iakynduh ia u president ka BJP ha ka nongbah Shillong.
Ki nongialam niam na ki kynhun balang bapher bapher kane ka jylla ruh kin ioh ia ka lad ban iakynduh ia u President ka BJP.
Ki seng jong  ki nongrep, ki seng jong ki dewiong kin iakynduh ia u President ka BJP.
Ym tang, katta, u Shah un iakynduh bad un kren ruh ia ki nongialam bad ki nongtrei jong ka BJP ha kane ka jylla bad ban sngap ruh ia ki jingeh bad ki jinglah jongki haduh mynta ha kane ka jylla ha kaba ka party ka dang duna bha ka bor jongka.
Katkum ka jingtip na ka BJP, kan  nym don ka jingialang paidbah ha kane ka  jingwan jong u Shah hynrei kan don tang ka jingialang bad ki nongkyrshan, ki nongialam ka BJP, ki dkhot kaban long ha Polo Towers Hotel.