Yn iakynduh CEM, ki nongsynshar

Shillong, 2 Jylliew:
Ka Grand Council of Chiefs (kaba kynthup ia ka Dorbar Ki Khlieh Nongsyn synshar Ka Ri Hynniew trep, Ki Sirdarship, Ki Dolloi, Ki Nokma bad Federation of Khasi States) kin ia kynduh 4 tarik Jyliew 2013 ban ia kren halor ka shithi na ka tnat kam poh iing ka sorkar India.
Dang shen ka la don ka jingia syllok hapdeng u Bah Pynshngain N Syiem, MLA & MDC, CEM, KHADC bad u Bah John F Kharshiing, Chairman, Grand Council of Chiefs of Meghalya, Spokesperson, Federation of Khasi States, ha ka 22 tarik Jymmang 2013, Shillong, halor ki kam kiba iadei bad ka jingpynbeit thymmai (amendment) ia ka Sixth Schedule, ka Village Administration Bill bad kiwei kiwei kiba yn sa rah ha ka KHADC Session kaban sa long ha shen.
Na ka liang u Bah Pynshngain N Syiem, MLA & MDC, CEM, KHADC, u la pynpaw ba ki bor KHADC ki la khreh ban wanrah ia ki Ain kiban iada ia ki bor Shnong, bad u la pynsngew ia ka jingdonkam ban wanrah kyrieh ia ki Ain ki Rule Synshar Shnong, Raid bad Dorbar Hima, kum shibynta ban kin ioh ia ka jingithuh da ka bor jong ka ain bad ba kin ioh ban long ki jingsynshar tynrai kiba ki paidbah, ki khun ki hajar ki angnud, katkum ka para 3, bad 11 jong ka sixth Schedule. U la pynpaw ruh ia ka jingsngewkhia halor ka kynrum kynram kaba don bad ki Ain bat khyndew ha ki Shnong, Raid bad ki Hima bapher bapher kiba la wanrah ia ka jingia kynad ha ki jaka bapher bapher.
U la kyrmen ba da ki jingpynbeit thymmai ia ka Sixth Schedule sa shisien pat kin sa wanrah ia ka jingiada kiba bniah halor kiba bun ki bynta jong ka jinglong ba kyrpang ka jaidbynriew rit paid.
Ha kane ka jingiakynduh na ka liang u Bah John F Kharshiing, Chairman, Dorbar Ki Khlieh Nongsynshar Ka Ri Hynniewtrep, u la kyrpad bad kyntu jur ia u Bah Pynshngain N Syiem, MLA & MDC, CEM, KHADC ba ki bor KHADC ki dei ban shim khia ban pynsted ban thaw ia ki Ain ki Rule kiban pynneh, pynjanai, bad kiban nang pynkhraw ia ki Riti ki Dustur.
U la pyntip ruh ia u Bah Pynshngain N Syiem, MLA & MDC, CEM, KHADC, ba ka Dorbar kan ia kynduh ha ka 4 tarik June 2013, ha Lumbasuk, Demthring, Shillong, por 11 baje mynstep, ha kaba kin ia kren sani bha halor kitei ki kam bad khamtam halor ka shithi na ka tnad Ministry of Home Affairs, Sorkar India kaba la phah da ka shithi sha ka Sorkar Meghalaya ban pan ia ka jingsngew bad jingaijingmut jong ka Sorkar Meghalaya halor ka jingdawa jong ki Khlieh Nongsynshar ban ioh ia la ka jong ka Council kat kum ki jingiateh bad ki jingkular.