Yn iakren PBM ki Seng riewlum

Shillong, 11 Nohprah:
Ka Steering Committee (SC) ba la thaw da ka NPP, BJP, KHNAM bad ka UDP ban wad ia u kyrtong iamon lang na ka bynta ka MP elekshon, kan iakynduh ia u kyrtong ka People Candidate Forum (PCF) u Rev PBM Basaiawmoit.
“Ngi la rai ban iakynduh ia u Rev Basaiawmoit ban ioh ia ka jingmut jongu na ka bynta ka elekshon Lok Sabha. Haduh mynta, kam pat long shai la un iakhun ne em”, la ong u secretary ka Steering Committee u Bah Allantry F Dkhar ha kane ka sngi Balang.
U Bah Dkhar u la iathuh ba khlem da khein ia ka party, yn sa phah ia ka kynhun ban iakynduh ia u Rev Basaiawmoit.
U la ong ba ki la iakynduh kham mynshwa ia ki dkhot ka PCF ban iakren ia ka jingdonkam ban ioh ia u kyrtong iamonlang ban pynliem ia u kyrtong ka Congress.
“Hynrei ka jingiakynduh bad ki kam long kaba biang namar ba khlem lah ban shim ia kano kano ka rai” la ong u Bah Dkhar.
U secretary ka steering committee u la ong ba ka PCF ka la phah ia ka shithi da kaba pan jingkyrshan ia u Rev Basaiawmoit.
Hynrei na ka liang ka Committee ka la ong ba ka long kaba eh ban ai jingkyrshan ia u kyrtong ka PCF namar ba kam dei ka seng sain pyrthei.
“Ngin pyrshang ban pynbor ban kyrshan ia u kyrtong ba la tyrwa da ka UDP” la ong u Bah Dkhar.
Kham mynshwa ka UDP ka la tyrwa ia ka kyrteng jong u bah Paul Lyngdoh ban iakhun na ka Shillong Lok Sabha seat.
Ha kawei ka liang ka PCF ka la rai ban pynlong ia ka jingialang ha Community Hall, Mawpat Pyllun, ha ka 23 tarik Nohprah por 11 baje mynstep.
Ka PCF ka la kyrpad ia ki paidbah bad nongkyrshan jong ka Forum na 36-Shillong Legislative Assembly Constituency ban wan sha katei ka jingialang ban iakren ia ka MP elekshon.