Yn iakhun U Bah Pangniang na Rambrai

Nongstoiñ, 21 Jymmang:
Ka Hills State People’s Democratic Party (HSPDP) Rambrai Area Unit, ha ka jingialang jong ka Executive Committee, kaba la ia kynduh ha ki khyndiat sngi ba ladep, da kawei ka sur ki la shim ia ka rai ban jied bad phah biang ia ka kyrteng jong u bah KP Pangniang, MLA kum u kyrtong jong ka party u ban iakhun ia ka election MLA 2018 na ka Rambrai Jyrngam Konstitwensi.
Ia katei ka EC jong ka seng la wan ban mih khmat da baroh ki President, Secretary, jong ki Unit bapher bapher, na ka bynta ban pyndep ia ka jingbthah jong ka Central Body ha kaba iadei bad ka jingjied ia u kyrtong u ban iakhun ia ka election MLA na katei ka Konstitwensi. Shuh shuh ha katei ka jingialang khlem kano kano ka jingwit jingwoh ki nongkitkam jong ka party HSPDP, Rambrai Area Unit da ka jingiamon lang baroh ki la tyrwa biang ia u MLA, U bah KP Pangniang ba un long kum u kyrtong jong ka seng na ka bynta katei ka election.