Shillong:U myntri rangbah ka jylla u Conrad K Sangma mynta ka sngi, u la wanrah da ka jingkren sou moto hapoh ka iing dorbar halor ka jingmih khubor ia ka jingjaboh ka lyer ha Byrnihat.
Haba wanrah ia ka jingkren halor kane, u Conrad u la ong ba dang shen ka Byrnihat ka la paw kum ka jaka kaba jaboh tam ha ri bad ha ka pyrthei ha ki lad pathai khubor ha ka ri.
U Conrad u la ong ba katkum ka data jong ka saw tylli ki jaka test lyer ka Meghalaya, ka jingthew ka la kdew ba ka jingjaboh ka lyer ne Air Quality Index (AQI) ka long kaba dang biang. U la ong ba ka Meghalaya State Pollution Control Board ka la pyllong ia ka jingjurip ia ki karkhana ha 13th Mile, Byrnihat, ka la lap ba ki don ki kompeni kiba pynkhein ia ka kyndon bad ka la khang kdam ia ki 7 tylli ki karkhana.
U myntri rangbah u la ong ba naduh u Kyllalyngkot haduh mynta 2025, ka jingthew lyer ha Byrnihat ka la kdew ba ka sniew bad kane ka dei na ka jingwan her ka jaboh na Assam, kaba don markhap bad ka Meghalaya. Ka ktem karkhana kaba hap ha Byrnihat ha Assam, la pynbna da ka Central Pollution Control Board ka sorkar India kum ka jaka kaba jaboh tam bad ka la ai dak saw ruh. U Conrad ula pyntip ba ula thoh sha u myntri rangbah ka Assam halor kane, ban don ka jingiatreilang hapdeng kine ki ar tylli ki jylla ban tehlakam ia ka jingjaboh ka lyer.
Phi don ban ong eiei?