Yn iaid paidbah ki 3 seng ha ka 16 tarik

Shillong,11 Naiwieng:
Ki Lai tylli ki senghalang ba kynthup ia ka CSWO, ka Thma u Rangl Juki bad ka Garo Student Union kin pynlong da ka jingiaid paidbah, naduh na Fire Brigade shaduh sha Parking Lot jong ka Addl Secretariat ha ka 16 tarik u naiwieng. Katei ka Rally kan dei ban pyrshah ia ka jingthmu ban pyntreikam da ka aiñ shipai ne ka AFSPA ha ri lum Garo. “Baroh ngi dei ban shimkhia ba ym dei ban pyntreikam ia katei ka aiñ ha ka jylla bad ka donkam ba ngin ia snohkti lang baroh ban pyrshah” ong ka kong Angela Ryngad ha ki kyrwoh khubor mynta ka sngi. Ka la ong ruh ba ka long kaba suk ban pyntreikam da ka AFSPA hynrei kan long pat kaba jwat ban weng ia ka ha kaba ka la ai nuksa ba ha Manipur la wanrah ia katei ka ain shipai naduh u snem 1958 hynrei haduh mynta ym pat shym la lah ban pynkynriah bad dei kane kaba la pynlong ia ka Irom Sharmila ban shah tngan haduh 15 snem.