Yn iaid paidbah ka KSU Nongpoh, ban pyrshah halor ka jinglip bording

Nongpoh: Ki nongialam ka KSU Nongpoh Circle, ki la pyntip paidbah ba kin sa pynlong ia ka jingiaid paidbah ha ka 2 tarik u Nailar, kata na Pahamsyiem ter ter shaduh ophis u Sub- Divisional Officer ka MeECL Nongpoh Division.

U samla Baiaishanlang Kharshanlor, General Secretary ka KSU Nongpoh Circle, u la ong ba ka nongrim kaba la pynlong ia ka seng ba kan shim ia katei ka sienjam, ka dei hadien ba ki paidbah ki la jynjar eh na ka jinglip bording kaba khah khah ha ka thain Nongpoh hi baroh kawei, bad kaba la pynjynjar eh ia ki paidbah, ki khynnah skul, ki samla pule bad ia kiwei kiba trei ia ki kam bapher bapher.

Namarkata , na ka liang ka seng ka kyntu ia ki paidbah ka thain Nongpoh, ba ki dei ban ai ka jingkyrshan ia ka seng ha katei ka sngi ba ka seng kan iaid paidbah, kaba long ruh ban pynpei shkor ia ka tnat MeECL, kaba la leh bym suidniew halor ka jinglip bording khah khah bad ruh ka jingkiew ka bai thang bording, wat haba ka bording kam long kaba thikna, u la bynrap.