Yn iaid paidbah ka HYC, mynta ka sngi, ba slem ka baibam ki samla pule

Shillong:Ka Seng Hynniewtrep youth council (HYC), ha ryngkat ka kynhun jong ki samla pule jong ka jylla Meghalaya kin pynlong ia ka jing ia iaid paidbah mynta ka sngi, na madan fire-brigade Laitumkhrah sha Additional Secretariat, kum shi bynta ban pynsngew ia ka sorkar ia ka jing dawa ka jongki, ba ka Sorkar ka dei ban pyllait noh ia ka bai bam jong ki samla pule (scholarship) kaba la mang na ka bynta u snem 2021-22.Katei ka rai, ka dei, hadien ka jing kutnoh jong ka por kaba ki la buh ha ka jingiakren bad u myntri jong ka tnat pule puthi Jong ka jylla, u bah Lahkmen Rymbui.

Ka Education cell jong ka Seng, ha ka jingialam jong u Education Secretary u Samla Enlang Sawian, haba iakren sha ki lad pathai khubor, u la iathuh ba ka seng ryngkat bad ka kynhun ki samla pule na ki kylleng ki kolej jong ka jylla, kum na ka Skulbah Northeastern hill University (NEHU), Shillong Law college, Ribhoi college,Sngapsing college, institute of chartered Financial analyst of India (ICFAI), University of science and Technology, Meghalaya (USTM) bad kiwei kiwei ki kolej na kylleng ka jylla Meghalaya.

Haba iathuh shuh shuh, u samla Sawian, u la ong ba ka jing bym shimkhia ka Sorkar ha ka jingialam jong ka National people’s party (NPP) ka pynduh mynsiem bad pyndiaw mynsiem noh iaki samla pule bad dei halor kane ka nongrim ba ka seng ka kwah ban pynbor ia ka Sorkar lyngba ka jingialang ha ka por 1baje noh phai sngi ha madan fire-brigade Laitumkhrah bad sdang ia ka jing ia iaid paidbah ba jai jai sha Additional Secretariat.
Une u nongialam u la iathuh ruh ba kumba 700 ngut eiei ki samla, la khmih lynti ba kin wan ia shim bynta lang kynthup ki samla pule na Ribhoi,Amlarem, Nongstoiñ ruh kin wan sha kane ka prokram.

Haba iadei bad ka jing pyntreikam jong ka sorkar iaka 144Crpc ban khanglad ia kino kino ki jing ialang paidbah ban pyrshah Sorkar, u samla Enlang Sawian, u la iathuh ba ka Seng ka la dep phah ia ka jingpan jingbit na ki por ba dei khmih jong ki distrik haba iadei ba kin ai jingbit bad lada kim ai jingbit, na ka liang jong ka Seng hi kan iaid beit sha khmat ia ki prokram kumba la pynbna, namar ba ka jingiakhih kam dei ban pynkheiñ aiñ ne wan rah kino kino ki jing kulmar, hynrei ka jing iakhih kan dei beit ka jing myntoi jong ki samla jong ka jylla Meghalaya hi baroh kawei.