Yn iaid beit ka pakhang ophis ba shi taiew ka HSPDP

Shillong, 12 Jymmang:
Ka pakhang ophis ba shi taiew ka HSPDP kan iaid beit lashai ka sngi Balang kumba la pynbna bad ia kane la shim ha ka jingialang jong ka HSPDP kaba long mynta ka sngi.
Ka HSPDP ka la khot pakhang ophis ban pynbor ia ka sorkar ba ka dei ban thaw ain noh na ka bynta ban pynkut ia ka jingkynduh jingeh jong ki bor shnong hadien ba la khang ka Meghalaya High Court.
U Vice president ka HSPDP u Bah Ardent M Basiawmoit u la ong ba ka seng ka la rai ban iaid shakhmat hadien ba ka sorkar kam shym la ai jubab eiei sha kane ka seng. “Ki jingkren ka sor kar ki shu long tang ha ki lad pathai khubor hynrei khlem ioh shithi eiei”, la ong u nongialam ka HSPDP.
“Ka rai pakhang ophis kan iaid beit lashai ka sngi bad kan shong ha ka sorkar ba kan ai ju bab”, la ong u Bah Basiaw moit. ”Ngi la iohi lyngba ki lad pathai khubor ba ka sorkar ka la pdiang ia ka ordinance. Hynrei ngim pat ioh jingthoh eiei na ka sorkar halor kane”, la ong u Bah Basaiawmoit haba kren sha ki nongthoh khubor hynne ka sngi Hatmajai.
Hynnin ka sngi ka sorkar ka la pdiang ia ka ordinance ka Meghalaya Local Administration (Empowerment of Traditional Institutions, Traditional Bodies, Headmen in Governance Delivery System) Ordinance, 2015 ba la ai jingmut da ka tnad ka main.
Ia kane ka Ordinance kan sa phah ban pdiang da u Lat.
U Bah Basaiawmoit u la ong ba ka HSPDP ka dawa ba ka sorkar ka dei ban shim ia ka Village Administration Bill (VAB), 2015 kaba la pdiang da ka KHADC.
”Ngi la bat beit ba ka sorkar ka dei ban shim ia ka VAB  haba shna ia ka ain jong ka sorkar jylla ban ai bor ia ki nongsynshar shnong. Ngi kwah ba ka sorkar ka dei ban shim ia ki jingbuh jingsat na ka VAB jong ka KHADC,” la ong u vice president ka HSPDP.
U la ong ba ka HSPDP kam ju dawa ban thaw da ka ordinance.
“Naduh ba sdang, ngi la ban jur ia ka sorkar ba kan pdiang noh ia ka VAB.  Ngi bat ia ka jingdawa”, la ong u Bah Basaiawmoit.
Ha kajuh ka por u la byrngem ba ka sorkar bad kiwei ki tnad kim dei ban pynshitom ia ki nongtrei kiba pep ha ka sngi pakhang ophis.
”Ngim artatien ban pynlong biang ia ka jingiakhih lada ka sorkar ka pynshitom ia ki nongtrei ha ki sngi pakhang ophis”, la byrngem u nongialam ka HSPDP.