Yn iai buddien, ka seng Congress ia ki ishu kiba ktah ia ka jaitbynriew

Shillong:U Bah Process T Sawkmie u ba dei u President jong ka Shillong City Congress Committee u la pynpaw ba watla ka seng ka kylla rit paid hapoh ka iing dorbar thawaiñ ka jylla ha dien ba ki 12 ngut ki MLA ka seng ki la mih noh hynrei kum ki MLA kiba dang don hapoh ka seng pat kin dang iai bteng ban buddien ia ki ishu kiba hakhmat eh jong ka jaitbynriew.

Haba kren bad ki lad pathai khubor, u Bah Process T Sawkmie u la ong ba watla ki 12 ngut ki paralok napoh ka seng Congress ki la mih noh hynrei kam mut ba kiei kiei ki ishu jingeh jong ka jaitbynriew kin shu sahkut noh bad na ka liang ki san ngut ki MLA ka seng Congress ryngkat ka seng bad ki MDC kiba dang don kin dang iai kren bad iai tynruh ia ka sorkar ha kaba iadei bad ki ishu jong ka Jaitbynriew kiba thup ia ki ishu kum ka jingdawa ban pyntreikam noh ia ka Inner Line Permit(ILP), ka jingdonkam ban weng noh shisyndon ia ka rai jong ka sorkar kmie ban pyntreikam ia ka CAA namar ha kaba iadei hi mynta bad ka CAA ym pat shym la pyndonkam satia hapoh ka ri hi baroh kawei bad ka long tang kum kaei kaei ka jingleh donbor jong ka Sorkar India bad kumjuh ruh ia ka kam kaba iadei bad ka jingshah siat iap jong u General Secretary barim ka seng Hynniewtrep National Liberation Council(HNLC) u Bah Cheristerfield Thangkhiew.