Yn ia kynduh ki CEM, ia u Rajnath Singh

Shillong, 10 Naitung:
Ki nongialam ka komit ba dang shu thaw shen da ki CEM ka KHADC ka FOCUSS ki la leit ban ia kynduh ia u myntri khynnah ka sorkar pdeng u Kiren Rijiju ha nongbah Guwahati ban ia kren ba u dei ban thaw noh da ka komiti ba kyr pang ban ia kren halr ka jingpynkylla ia ka 6th Schedule. Ia kane ka kynhun la ialam khmat da u Chief Executive Member (CEM) jong ka Khasi Hills Autonomous District Council u Bah Pynshngaiñ N Syiem uba dei u chairman jong katei ka Forum bad la synran lang ia u da u CEM ka North Cachar Hills ADC u Debojeet Thaosen, u CEM jong ka Karbi Anglong Autonomous Councils (KAAC) u Tuliram Ronghang ryngkat ki EM ka KHADC ba kynthup ia u Bah Antonio War, Bah Banteidor Lyngdoh bad Kong Grace Mary Kharpuri bad ha kaba ki la aiti ruh ia ka dorkhas sha u Rijiju.
Ha katei ka jingiakynduh ki nongialam ka FOCUSS ki la batai ha u Rijiju ia ka jingkwah ki ADC ka thain shatei Lam mihngi ban pynkylla ia ki bynta jong ka 6th Schedule bad kumjuh ruh ka jingbym ioh bhah pisa na ka sorkar pdeng. Hadien ka jingiakynduh ia u Rijiju, lashai ka sngi kitei ki nongialam jong ki district Council kin leit ban ia kynduh ia u Rajnath Singh u myntri kam pohing ban ia kren ia katei ka kam.