Yn ia kynduh heh pulit ka KSU Mawkajem

Shillong, 24 Nailar:
Ka khasi student Union Mawkajem Area Unit ka la ai ka jingiaroh sha ki pulit ka Pynursla PS,Sohra PS bad ka Mawngap PS, namar ka jingkhmih ia ka surok bah bad kem ia ki 20 ngut ki briew kiba ia dih kyiad bad kren ktien khlemakor ha kynriang surok jong ka Umtyngar,Kyrdemkhla bad shnong Laitlyngkot ha ka 16 tarik u Nailar 2015.
Ka KSU ka la ong ba ka jingshimkhia ki PS ia ka jingkyrpad katei ka seng ka long ka jingiohnong kaba khraw ia ba iaroh hynrei kumjuh ka jingioh mynsiem jong ka Union ban bteng ia ka jingkhynra ia ki kamsniew kum ka jingpynieng kali khlem akor ha kynriang surok naduh ka shnong Laitlyngkot haduh ka shnong Pomlum,ha kaba ha kine ki kali ba ieng kynriang surok la shem ba ki dei kiba iadih kyiad bad leh khlemrain bad kren ktien khlemakor.
Watla,ka Union ka ju pynlong ka jingkhynra ia ki kali na ka por sha ka por ha kine ki jaka lane ki kynriang surok kiba hap hapoh ka jaka jong ka jingkhmih ka Union ka la mana ia ki nongdih kyiad ba lada lap yn ai ryngkat ka saja bad maham, hynrei kine ki kam sniew ki nang bteng sa sha kiwei pat ki jaka ne kynriang surok ha ka shnong Umtyngar bad Kyrdemkhla kiba ym hap hapoh ka jingkhmih ka Union, ong ka kyrwoh khubor.
Ban pyntreikam ia ka jingthmu ha ka jingeh jong ka kyiad,ka jingleh khlemrain,ka jingjia aksiden kali bad kiwei kiwei ki kamsniew,ka Union ka la rai ban leit kynduh ia u O.C jong ka Pynursla,Sohra bad Mawngap P.S ha kine ki khyndiat sngi ban iapyrkhat shaphang kine ki mat ban wad ia ka lad ka lynti bad pynkhlain ia ka jingkhynra pyrshah ia ka kyiad,ka jing aksiden kali bad kiwei kiwei ki kam khnang ba kine ki jaka kin lait na ki jingeh ki jingjynjar na ka bynta ka jingiada ia ki riew paidbah.