Yn ia khun MDC, 3 ngut ki kaikhlaw pyndem wait

Shillong, 24 Nailar:
Mynta ka sngi ki nongialam samla jong ka National People Party (NPP) ki la leit ia kynduh ia u myntri ba peit ia ka District Council Affair( DCA) u bah HDR Lyngdoh ban leit ia kren ba un pynthikna ba ka elekshon Garo Hills Autonomous District Council (GHADC) kan iaid beit iaid ryntih khlem kano kano ka jingshah pyntieng lane ka jingshah pynbor ki paidbah nongthep vote ha katei ka elekshson ban wan.
Katkum ka jingtip kaba u nongthoh khubor u la ioh lum la iathuh ba katei ka jingleit ia kynduh myntri ka NPP na ka bynta ka elekshon GHADC ka ban sa long ha ka 12 tarik u risaw, 2015 ka dei hadien ba ka la ioh jingtip ba kin don ruh ki kai khlaw pyndem wait ki ban ia air eng ha katei ka elekshon.
Ki lad khubor ki la iathuh ba haduh mynta ki kai khlaw pyndem wait kiba la thikna ban ia khun ha katei ka elekshon ki don 3 ngut, kitei ki kynthup ia u Bernard Sangma u Chairman ka ANVC-B u ban ia khun na Tura konstitwensi,u Jerome Momin u ban ia khun na Chokpot bad u Markus Marak u ban ia khun na Siju Konstitwensi.Haduh mynta ym pat shym laioh jingtip na kano ka seng sain pyrthei kitei ki 3 ngut kin ia khun, hynrei la ong ba u Markus Marak u ban ia khun na Siju Konstitwensi un ia khun na kawei ka seng sain pyrthei ka ba don ka jingiatrei ryngkat ryngkat bad ka BJP. Shuh shuh ki lad khubor ki la iathuh ba kumba ka paw mynta na ki 20 tylli ki Konstitwensi ha GHADC ka dang paw ba ki don dang 3 ngut ki kai khlaw pyndem wait ki ban ia aireng ha ka elekshon MDC jong ka GHADC, hynrei la ong pat ba ki lah ban dang don kiwei pat ruh nalor kitei ki 3 ngut naba haduh mynta ki dang ki dang don kiwei pat ki ba dang iaid sop sop ban twad jingmut na ka bynta katei ka elekshon.
Hadien ba la ia kynduh ia u myntri ka tnad DCA la ioh jingtip ruh ba ka NPP lashai ka sngi kan leit ban ia kynduh ia ka myntri kam pohing katei ka jylla ka kong Roshan Warjri ban ia kren ia ka juh katei ka phang kata ba ka sorkar ka dei ban pynthikna ba ka elekshon ha Garo Hills kan iaid beit iaid ryntih khlem kano kano ka jingshah pynthud.