Yn ia khih ka HANM ba ngat MPDA u President ka WKH

Shillong,01 Naiwieng:
Ka Hynniewtrep Achik National Movement, HANM Khliehriat Circle haba pynpaw ia ka jingsngew bitar ia ka jingshah pynngat MPDA u President ka seng na West Khasi Hills district u Bah Arphul Kharbani, ka la kynnoh ba katei ka jingshah pynngat u para dkhot ka dei namar ka jingsynshar donbor u Deputy Commissioner ka West Khasi Hills. Ka seng ka la kynnoh ruh ba la pynngat MPDA ia u para dkhot khlem nongrim bad khlem ki jingshisha bad ka dawa ruh na ki bor pyniaid District ka West Khasi Hills ba ki dei ban pynshisha bad ban pynshai paidbah ia ka jingkynnoh khlem nongrim ia u dkhot ka seng.
Ka kyrwoh na u Samla Sambormi Lyngdoh president HANM-Khliehriat Circle, ka la iathuh ba ka HANM Khliehriat Circle kumjuh ruh ka HANM East Jaintia hills district shen kan sa shong jingialang na ka bynta ban shim rai ban pynbna ia ki jingiakhih hapoh East Jaintia Hills, la ong ruh ka kyrwoh na u
bah Ency shadap President HANM-EJHD.
Ka HANM North West Khasi Hills, ha ka jingpyllait khubor ka la kynnoh ia u Bah S.Kharlyngdoh, DC ba u dei uba la leh ia ka kam ban pynngat MPDA ia u nongialam ka seng.
Ka seng ka la ther tyngeh ruh ia u DC da kaba ong ba ha ka jaka ba un leh ia ki kam kiba bha ia u paidbah, u pyni bor pynban da kaba phah kem bad phah thwet ia ki dkhot sengbhalang bad ban pynngat ruh ha ki kyndon ba eh jong ka ain.
Ka seng HANM naduh ki Unit, ki Circle West Khasi Hills ha ka kyrwoh jong ki, ki la pynrem jur ia ka jingleh u DC, West Khasi Hills ha ka ban pynngat MPDA ia u nongialam ka seng.