Nongpoh, 09 Nohprah: U Bah Prestone Tynsong, Symbud Myntri rangbah ka sorkar jylla bad ha kajuh ruh ka por, uba dei u Myntri ka tnat ki kam surok, mynta ka sngi un sa hiar sha Umden bad kata ka long, na bynta ban leit buh ia u mawnongrim na bynta ban shna bha noh ia ka surok na Nongpoh sha Umden.
Ia ka prokram ban buh mawnongrim, yn pynlong ha Madan Umden, ha kaba nalor u Symbud Myntri rangbah, yn sa sakhi ruh da ka jingdon u Bah Mayraldborn Syiem, MLA Nongpoh, ki ophisar ne ka tnat PWD lem bad shibun ki nongialam shnong jong ka thain Umden hi baroh kawei.
Lah ruh ban kdew hangne, ba naduh ba ka sorkar ka la pynbna paidbah ba ka la buh ia ka jingpynmang tyngka, na bynta ban shna pynbha noh ia ka surok Nongpoh-Umden bad shaduh Sunapur (NUS), ka la pynkmen eh ia ki paidbah, ha kaba kumba ka long mynta la la ioh ia ka jingpynmang pisa na bynta ka surok na Nongpoh sha Umden, kaba don ia ka jingjngai kumba 20km, katba ka surok na Umden sha Byrnihat, ka dei kaba la ioh ia ka jingpynmang lyngba ka skim PMGSY.
Ka surok Umden, ka la dei kawei na ki mat ba la jur bha ka jingiakren ha ki paidbah, namar ka dei ka surok kaba la pyndonkam da ki paidbah ha ki shnong ba bun ha ka thain Umden, ha kaba ka jingsniew ka surok, ka la buh jingeh shikatdei eh ha ka leit ka wan ki paidbah.
Kumta, lehse na ka jinglah ka sorkar ban buh noh ia u mawnongrim, na bynta ban shna noh ia ka surok na Nongpoh sha Umden, ka la pynkmen eh ia ki paidbah bad ki nongialam shnong ka thain Umden, ia kaba la khmieh lynti ruh ba shen katei ka surok, ka sa sdang noh ban shna.
Phi don ban ong eiei?