Yn hiar U DGP sha Garo Hills, ban rat tyllong ia ki kaikhlaw

Shillong,
26 Rymphang:
U Director General of Police-DGP ka jylla, U Rajiv Mehta u la ong ba ka thong kaba ha khmat eh ki pulit ka dei ban teh lakam ia ka jingthom bor pyrshah ia ki kynthei bad ki khynnah. U Mehta uba la bat teng ruh mynshuwa ia ka kam ADGP ka tnad pulit ka jylla u la ong, ba ki kam thombor ia ki kynthei khynnah kam dei tang ha kane ka jylla hynrei ka ju jia ha baroh kawei ka ri, hynrei kaba kham pher ka long ba ha kiwei pat ki bynta jong ka ri la thombor ia ki kynthei khynnah da ka kynhun ki runar kiba pyntriem, katba ha kane ka jylla pat la leh da ki riew paidbah.
U Mehta, uba la shah pynkynriah noh sha Delhi shuwa ba un shimti ia ka kam DGP hadien u PJP Haneman, uba la shongthait noh u la ong ba ki kam thombor ia ki kynthei ki dei ki kam pyntriem kiba pynkynriw met ia ka imlang sahlang, u la ong ba donkam ka jingiatreilang ka imlang sahlang ban teh lakam ia kiba kum kitei ki kam pyntriem ia ki kynthei. U la kular ba ki ophisar ka tnad pulit bad ki nongialam shnong bapher bapher ba kin ia trei lang, namar ba tang ki pulit hi kin ym lah ban tip bad kin ym lah leh eiei nalade hi khlem ka jingtreilang.
Ha kaba iadei pat bad ki kam pyntriem ki lehnoh ha ri-lum Garo, u Mehta u la ong ba ki pulit kin pynjem khnap ia ki lehnoh ha kitei ki thain bad shen ha ki taiew ban wan un sa leit ban peit dalade hi ryngkat ki heh pulit ban sngap ia ka jinglong jingman katei ka thain. “Ngin trei borbah ban ia khun pyrshah bad ki lehnoh” u la ong, u la ong biang ba um lah ban buh por lano ki pulit kin lah ban pynkhuid ia ki lehnoh ha ri lum Garo namar ba ban ia khun pyrshah ia ki lehnoh haduh ba kin da jem jai kan bam por.
Nalor ka GNLA u la ong ba kiwei pat ki seng lehnoh kiba leh ia ki kam pyntriem dei ban pynngat ha ki kyndon ka ain, “Ha katei ka jingleit jngoh jong nga kaba lai-saw sngi, ngan lum ia ka jingialang bad baroh ki SP ban sngap ia ka jinglong jingman katei ka thain” u la ong. Ha katei ka jingialang u la ong ruh ba un lum ia baroh ki SP bad ki CO ba kin pyntip ia ki jaka bad ki bynta ba ki lehnoh ki thaw ktem.