U Deputy Commissioner (DC), jong ka East Khasi Hill District u Sanjay Goyal u la ong, ki bor pyniaid District lem bad ki pulit ki dang thwet jur ia ki nong ialam sengbhalang kiba pynlong ia ki jingia khih bapher bapher.
U DC u la ong ba ki sengbhalang kin hap ban bah khlieh ia ka jingduh nong jing ki mar sorkar bad kumjuh ruh ki mar paidbah kiba la julor ha kine ki jingiakhih jong ki sengbhalang bad kin hap ruh ban siew ia ka bai lut ksan.
U la ong ba dei ka iingbishar ka ban rai ban siew halor ki jinglutksan bad ka sorkar ka la khreh ban leh ia kane katkum ka kyndon jong ka ain Meghalaya Maintenance of Public Order Act.
U la iathuh ba, haduh mynta ki jingduhnong bad shah pynjulor ha kine ki khyndiat sngi ba la pynlong jingiakhih da ki sengbhalang ka la kot da ki phew lak tyngka.
U la iathuh ba wat lada la donkti da kiwei pat ki runar, hynrei ki sengbhalang kin hap ban bahkhlieh ia ka jingjulor namar ka don jingiadei bad ki jingiakhih.
U DC u la pynrem jur ia ki runar kiba la donkti ban ther maw ia ka kali Ambulance hynnin ka sngi. U la iathuh ba ki sengbhalang kim lah ban shu lynthaw maw ia ki kali kit nongpang. Ha ka juh ka por u la iathuh ba, ki pulit ruh kin nym lah satia ban pyndonkam ia ki kali Ambulance.
Haba kylli la ki bor pyniaid District kin pynngat ne em ia kine ki nongialam sengbhalang hapoh ka kyndon ain MPDA, u DC u la ong yn hap ban shim rai ha ka por kaba biang lada i donkam yn pynngat ha kane ka kyndon ain.
Halor ka jingbym wan trei ki nongtrei sorkar, u la ong ba ka shong ha ka sorkar ban shim ia ka rai pyrshah ia ki. Haba kylli pat balei ki bos sorkar kim iaid, u la ong ka julong ka rukom haba ym don ba iaid ba ieng ha kum kine ki pakhang shnong.
U la iathuh ba ki bor pyniaid District ki la pynkhreh ban pahara jur ha kine ki sngi ban wan khamtam ba la jan ka Puja bad kiwei ki jingleh kmen bad tamasa bad la pan pulit shuh shuh bad lada ym ioh ruh ka la biang ia mynta u la bynrap.
Phi don ban ong eiei?