Yn don ka jingmeh leilieh, tied pyrthat bad hap phria ha ka jylla

Shillong: Ka jinglong ka mariang ha ka nongbah Shillong, mynta ka sngi, ka long kaba khriat bad ka don ka jingslap ruh kaba la kham jur hi. Ka jingshit, kaba shit eh, ka long 12.5 degree centigrade, kaba khriat eh, ka long 6.4 degree centigrade. Ha Sohra, ka long 16.1 degree kaba shit eh bad 8.3 degree kaba khriat eh, nangta ha Umiam, kaba shit eh, ka long 16.4 degree bad kaba khriat eh, ka long 6.2 degree.

Ka tnat peit mariang, ka ai jingtip, ba ka jinghap slap, mynta ka sngi, ha ka nongbah Shillong bad Umiam, ka long kaba malu mala, haduh ka por 2.30 nohsngi.

Kan don ka jinghap slap kaba malu mala ha Shillong, ha ki 24 kynta ban sa wan, katba ha ki bynta jong ka jylla, kan don ka jingmeh leilieh, ka jingtied pyrthat bad ka jinghap phria, na bynta lashai ka sngi.