Yn dawa thaw EC ka UDA na u Lat ba kiew jingbun paid 16 ngut

Shillong:Ka kynhun United Democratic Alliance (UDA) kan leit iakynduh ia u Lat ka jylla, u RN Ravi ban dawa thaw ia ka Executive Committee (EC) ha KHADC hadien ba kane ka kynhun kala don 16 ngut ki MDC da ka jingwan iasoh sa ka kong Grace Mary Kharpuri. Ka KHADC ka don 29 ngut ki MDC bad ka UDA ka don 16 katba ka UDF ka don sa tang 13 ngut.

“Ka UDA kala don mynta 16 ngut ki MDC hadien ka jingwan pyniasoh ka Kong Grace Mary Kharpuri, shen ngin leit ban iakynduh ia u Lat ka jylla bad iaka sorkar jylla ban leit kam ba ngi lah don iaka jingbun paid ban thaw noh iaka EC” ong u Bah Teinwell Dkhar mynta ka sngi.
Ka UDA ka la pdiang sngewbha ruh ia ka Kong Grace Mary Kharpuri sha ka kynhun UDA mynta ka sngi.U bah Teinwel u la ong, naduh ba ka EC jong ka UDA ka la khyllem bad sah sa tang 14 ngut ki MDC hynrei mynta kane ka kynhun kala kiew sha ka 16 ngut da ka jingwan kyrshan jong u MDC Congress na Mairang u Bah Batskhem Ryntathiang bad ka MDC khlem seng na Nongshken ka Kong Grace.
Ka UDA mynta ka don 16 ngut ki MDC katba ka kynhun United Democratic Front (UDF) kaba la ialam da u Bah Latiplang Kharkongor kum u CEM mynta ka la don sa tang 13 ngut ki MDC.
Ha kawei ka liang, ka Kong Grace Kharpuri kala ong, ba ka jingleit kyrshan ka jongka iaka UDA kadei halor ka nongrim ba ka UDF kam don shuh iaka jingbun paid bad hadien ba la dkoh lut ki kam ki jam ha ka Council bad bun ki paidbah kila ud iaka jingbym treikam jong ka Council bad kum ka nongmihkhmat kala shim iaka rai ban ai jingkyrshan noh iaka UDA.
“Wat la ka UDF kala phah iaka kyrteng jong nga kum ka Deputy CEM hynrei haba nga kyrshan iaka UDA kam don eiei sha lyndet bad ngam shym la dawa eiei na ka bynta ka jingmyntoi shimet namar ba ka Council ka don hapdeng ka saw ka sian khamtam haba ki kam ki jam kila sahkut lut kumta nga la leit ban kyrshan iaka UDA ba kan ioh thaw iaka EC khnang ba kan lah ban bteng ban ai ka jingshakri ia u paidbah” ong ka Kong Grace.Halor ka jingsaphriang ki khubor ba u MDC khlem seng ka Nongkrem ula mih noh na ka kynhun UDA bad leit pyniasoh sha ka UDF, na ka liang u Bah Lambor Malngiang u la ong, “Haduh mynta nga don beit bad ka kynhun UDA bad kam long kaba shisha ba nga la mih noh na ka UDA ban leit pyniasoh bad ka kynhun UDF”.