Yn buddien U Bah Metbah Lyngdoh, halor ka jingioh District ka Sohra

Shillong:Hadien ba u Myntri Rangbah ka Jylla, u Conrad K Sangma u la pynbna ha kawei na ki prokram kaba la long hapoh Mairang ha ka 31 tarik u bnai Lber 2021 ban kyntiew kyrdan noh ia ka Mairang Civil Sub Division sha ka District, ha shwa ba ka Ri kan rakhe ia ka sngi laitluid jong ka, u Bah Metbah Lyngdoh u ba dei u Lamphang jong ka iingdorbar thawaiñ ka jylla bad ha kajuh ka por u ba dei ruh u MLA jong ka Mairang, u la pynpaw ia ka jingsngewkmen kaba shi kat dei eh ha kaba u la ong ba ka jingdawa District ha Mairang ka la long naduh mynshwa.

Haba kren sha ki lad pathai khubor mynta ka sngi, ka 6 tarik u bnai Naitung 2021 halor ka jingdawa ban kyntiew kyrdan noh ruh ia ka Sohra Civil Sub Division sha ka District, u Bah Metbah Lyngdoh u la ong ba kane ka jing iakren ka la ju long naduh ki por ba dang don u MLA barim u Dr Donkupar Roy bad na ka liang jong u Bah Metbah hi un dang iai khmih halor kane ka bynta bad un nang iai peit thuh haduh katno kane ka jingiakren ka la nang iaid shakhmat.