Delhi,22jymmang:
Ka khliehduh ka seng Congress ka Sonia Gandhi mynta ka sngi ka la kyntait war ia ka shithi risain kaba la ai da u Myntri Rangbah ka jylla Assam u Tarun Gogoi,”Ka President ka Congress ka la kyntiait ia ka jingtyrwa u Myntri Rangbah ka Assam ban risain” ong u Myntri ka tnad kam rep ka Assam ka
Nilomani Sen Deka haba kren sha ki nongthoh khubor hadien ba la wai ka jingialang jong ki bad u Gogoi. U Gogoi hadien ba u la ia kynduh ia ka President bad u Vice President ka Congress la iathuh ba u la kiar ban kren bad ki nongthohkhubor, hynrei la syrtap ia u da bun ngut ki nongkyrshan jong u ba kynthup ia ki myntri sorkar ka jylla Assam, ki MLA bad ar ngut ki myntri sorkar pdeng, ha ing sah jong u ha Delhi.u MLA ba kham rangbah katei ka jylla u Anjan Dutta u la iathuh ba ka president ka Congress ka la pynkup bor ha u Gogoi ban ialam ia ka seng ha katei ka jylla, u la ong ruh ba ka bynta ba nyngkong eh ba u Gogoi u dei ban leh la bthah ba un long pyrkhat biang ia ka rukom bhah shuki hadien ka 1 tarik u jylliew, ka sngi ba ka jinglong Myntri Rangbah jong u kan long lai snem, ha katei ka term kaba lai ba un long MR.U Dutta u la iathuh ruh ba ha ka jingiakynduh bad u Rahul , u Rahul u la pynpaw ba ka Congress ka don ka jingshaniah ha ka jingialam u Tarun Gogoi na bynta ka Assam, na ka liang u myntri ka sorkar pdeng u B K Handique, uba la shah rem ha kane ka elekshon MP ba la dep u la ong ba u Gogoi un long beit u MR ka Assam bad u nongialam ka Congress ha jylla Assam.Lah ban kdew ba u Tarun Gogoi, u Myntri Rangbah ka Assam u la shim ia ka rai ban risain noh na ka kam Myntri Rangbah dei hadien ka jingshah rem kput ka congress ha katei ak jylla ha kane ka elekshon MP 2014. U la long MR nadudh u snem 2001, lah ruh ban pynkynmaw ba ha kajuh ka sngi u MR ka Assam u la wan ia kynduh ruh ia u Treasurer ka Congress u Motilal Vohra bad u general secretary uba dei peit ia ka Assam u C P Joshi. U Gogoi u la pynpaw kham ha shuwa ruh ba lada ka Congress kan shah rem ha Assam un risain noh na ka kam jong u.
Phi don ban ong eiei?