Shillong: U bah Banteidor Lyngdoh, myntri ba dei peit ia ka kam rep u la ong ba ha kaba iadei bad ka KCC loan, lane ka ram ia ki nongrep, ka sorkar jylla kan iarap ynda ladep ai ia ka jingpynbna kham hadien.
La iathuh ba 2 percent yn bei pisa ka sorkar jylla na ka bynta kane ka ram khamtam na ka bynta ki nongrep kiba ju shim ram na ki bank da ka KCC, bad ia kiba siew tista kum hynniew percent ka ram. Lada ki siew tista ki hap ban siew noh tang san percent bad ka sorkar ka iarap ar percent ia ki, bad lada ka iarap ka sorkar ar percent ka la long ka jingiarap bad ka jingmyntoi na ka bynta jong ki.
U Bah Bantei u la ong ba ha kaba iadei bad ki khubor hamsaia, ba yn sa map noh ia ka ram jong ki nongrep u la ong ba la ai lad ia ki nongrep ban siew suki suki ia ka ram ba ki shim bad yn nym phah ia ki ban siew ia ka bai lutksan wat hadien ba la kut noh ka por jong ki ban pyndep ia ka jingsiew. U la ong ba kane ka liang jong ka sorkar hi, kan nym lah ban map ia kine ki ram, namar kane ka dei ka ram ba ki nongrep ki shim hashwa ban sdang ka jingkhang dam ha ka Ri baroh kawei.
U bah Bantei la iathuh ba haduh mynta ki ladon kumba sawphew hajar duna ki nongrep kiba shim ia kane ka ram tangba mynta u snem ki duna kiba shim ia kane ka ram namar ka jinglyngshop noh kane ka khlam COVID-19.
Haba kylli halor ka jingiarap ka sorkar kmie ia ki nongrep kaba iaid lai percent, u la ong ba ka jingiarap ka sorkar kmie ka dei tang na ka bynta ka bank NABARD kaba dei ka nodal agency na ka bynta ka loan bad hangne ka sorkar kmie ka ai ka jingiarap kaba lai percent, hynrei ka sorkar jylla ka ai jingiarap ar percent tang ia kiba nongrep kiba shim da ka KCC loan.
Hadien ba ladon ka jingkren bynñiaw jong uwei u dkhot ka BJP halor ba bun ki nongrep kim ioh iaka jingiarap na ka PM Kisan, u bah Bantei u la ong ba ka PM Kisan kadei jong baroh ki nongrep bad ki nongrep kiba la pynbiang lut ia ki kot ki sla ki bun kiba la ioh ia ka jingiarap kumba hynriew hajar tyngka bad ki bym lah ban pynbiang ia ki kot ki sla ki bun ki bym ioh bad ki la don kumba shi lak duna kiba la ioh ia kane ka jingiarap na ka sorkar haduh mynta.
Phi don ban ong eiei?