Yn bei pisa ka NFDB, ban shna iew dohkha ka Council

Shillong,
26 Rymphang:
U Executive Member (EM) ka KHADC ba peit ia ka iew ka hat, u Bah Donkupar Sumer u la iathuh ba ki la thmu ban pynbha ia ka iew ka hat jong ka Council lyngba ka jingpdiang bad kubur ka National Fisheries Development Board (NFDB) ban bei pisa kaban long 90 percent na ka 100.
Haba jubab ia ka jing iakren, ha iing dorbar mynta ka sngi, u Bah Sumer u la ong ba ka kynhun jong ka NDFB ki la wan jurip mynshem snem ia ki iew ka Council ha kylleng ki jaka kum ha Byrnihat, Laitlyngkot bad ha Smit.
 ”Ha kane ka jingwan jurip, ki heh ka NFDB ki la pdiang ban mang pisa na ka bynta ban pynbha ia ki iew ka Council”, la ong u Bah Sumer.
U la iathuh ba ka Council ka la dep phah ia ka DPR  sha ka NDFB halor kine ki iew.
“Ngi khmih lynti ban ioh ia ka pisa na ka NFDB hapoh u Nailur mynta u snem”, u la ong.
Ha kajuh ka por, u la iathuh ba ka Council ka la thmu ban pynduna ia ka jingkhapngiah ka iew dohkha ha Iewduh da kaba pynbha ia ka.
“Ngi dang thmu ban pynbha ia ka iew dohkha lyngba ka pisa ban sa ai da ka NFDB,” la ong u Bah Sumer.
U la iathuh ba la tyrwa T.4 klur ka jinglut na ka bynta ban pynbha ia ka iew dohkha ha Iewduh bad la kyntu ia ka Hima Mylliem ban ai jaka na ka bynta ki nongdie dohkha ba kin kynriah ha ka por ba pynbha ia ka.
U la iathuh ruh ba ki la phah ia ka jingtyrwa sha ki Hima bad ki Raid ban ai jaka na ka bynta ban shna ia ka iew ha ki thain khappud ka jylla .
 ”Ki iew kin pynkyntiew ia ka jingioh lum khajna jong ka Council”, u la ong.