Yn bei ka World Bank ban tei ia ki 10 tylli ki surok, ha ka jylla

Shillong:Ka Sorkar Meghalaya ka la pan ram na ka World Bank ban shna ia ki 10 tylli ki surok hapoh ka jylla Meghalaya ha kaba 5 tylli ki dei ki surok kiba hap hapoh ka Ri Lum Garo bad 5 tylli pat ki dei kiba hap hapoh ka Ri Lum Khasi bad ia kine ki surok yn shna lyngba ka Meghalaya Integrated Transport Project ia kaba yn sa bei tyngka pat da ka World Bank bad kiba kynthup ruh artylli ki jingkieng kata kawei sha Ri Lum Khasi bad kawei pat sha Ri Lum Garo khnang ba kan long ka jingmyntoi ia ki paidbah nongshong shnong ka jylla.

Ha kaba iadei bad kane, na ka liang u Symbud Myntri Rangbah ka jylla u la iathuh ba ula lum jingialang ia baroh ki ophisar jong ka tnad PWD khnang ban iathir bad iatai sani bha halor kane ka kam bad ka thong kaba ka sorkar ka la buh ban pyndep ia kitei ki projek ka long hapoh u bnai Nohprah jong ka snem 2022 bad ka pisa kaba la noh ban shna ia kitei ki projek ka long 554.67 klur tyngka bad ka jingjrong jong ka surok kaba thmu ban tei ka long 262.4 kilomitar.