Yn beh seng ia U Bernard ba khawai doh masi

Shillong, 31 Jymmang:
U Nongaiktien ka BJP uba peit ia ka Meghalaya u Nalin Kohli u la ong ba ka party kan sa beh seng ia u Bernard Marak uba dei u district president ka BJP, Tura namar ba u la pynmih ia ka jingthoh paidbah ban khot sngewbha ia ki briew ban khawai da ka doh masi ha ka jingrakhe dap 3 snem ka sorkar NDA.
Haba kren hynne sha ki nongthoh khubor, u Kohli, u la ong ba,”Ka party kam don kum kane ka jingthmu bad ka jingleh jong u, ka long pyrshah ia ka party. Un sa shah beh seng”,.
U la ong ba lada u kwah ban khawai da ka jingsngew bit jongu, kam don kano kano ka jingkhang na ka party hynrei ban pyndonkam da ka kyrteng ka party ka long pyrshah ia ka jingpyniaid jong ka party.
Kane ka jingbyrngem beh seng ia u Bernard, ka long hadien ba la kynnoh ba u la pynmih ha ki social media ba ka party kan pynlong ia ka jingkhawai doh masi ban rakhe ia ka jingdap 3 snem ka sorkar National Democratic Alliance ba ialam da u Myntri Rangbahduh ka ri, u Narendra Modi.