Yn beh krad ka CORP ia 13 ngut ki bar jylla

Shillong, 23 Jylliew:
Ka Confederation of Ri Bhoi People (CoRP) Raid Mawbuh Circle  ka la maham ba kan pynher krad noh ia ki 13 ngut ki bar jylla lada kim lah ban pynbiang ia ki kot ki sla hapoh ka sngi ba la buh.
Ki nongialam ka seng hapoh ka jingialam jong u President ka Raid Mawbuh Circle, Bah B. Lapang ryngkat bad ki dkhot ka Mawbuh Circle lem bad ki riew rangbah ka thain ki la leit ban khynra ia ki ar tylli ki jaka trei ba kynthup ia ka Umroi Presbyterian bad kawei pat ka jaka trei ba thymmai ha ka shnong Umroi Umsawria. Ki dkhot ka CoRP ki la leit ban khynra ia kitei ki jaka trei ar tylli hadien ba ki la ishan khmat ba ki don ki bar jylla kiba la wan ban trei bylla haba ki la ioh bat haduh 30 ngut ki bar jylla ki bym don kot don sla ha kitei ki jaka trei.
U President ka Raid Mawbuh Circle Bah B Lapang ula ong ba ha katei ka jingleit jurip ka seng ka la lap ba don 13 ngut ki bar jylla ki bym don kot don sla kum ki labour license bad kiwei kiwei. Kumta, ula ong na ka liang ka seng ka la maham ban pynher krad noh hapoh shi taiew lada kim lah ban pynbiang ia ki kot ki sla bad ka maham jur ia ki kontraktor ne ki heh spah  ba kim dei shuh ban wanrah ia ki bar jylla ban pyntrei ia ki kam ba ki trai shnong shnong ki danglah ban trei.