Shillong, 10 Jylliew:
Hadien ba la kut ka shiphew sngi ia ka jing buh por ia ka sorkar ba kan ai jubab halor ka Village Administration Bill ka KHADC bad ka JHA DC, ka Joint Action Com mittee (JAC) jong ka Synjuk Ki Rangbah Shnong ka Khasi bad ka Jaintia Hills ki la rai ban ap ia ka rai na u Lat ka jylla u V Shanmu ganathan halor kine ki ar tylli ki Bill.
“Ngi la rai ban ap ia ka rai na u Lat ka jylla halor kine ki ar tylli ki Bill. Kum u Lat ba thym mai ha kane ka jaka, ngi sngewthuh ba u don kam ia ka por ban eksamin bha shwa ia kine ki Bill shwa ba un ai ia ka rai”, la ong u president ka SK RS u Dr Werlok Khar shiing ha ki nongthoh khubor hadien ba la wai ka jingialang mynta ka sngi Balang.
U Dr Kharshiing u la ong ba ka JAC ka iaroh ia ki lynti ba ka sorkar ka la shim ban pyndep ia ka jingkular ban pynlong kam ia kine ki Bill ban phah sha u Lat ka jylla ban ioh ia ka jingmynjur.
Ka SKRS ka la ong ba ka sorkar ka dei ban weng noh ia ka ordinance mardor bad kyntu ia baroh 36 ngut ki MLA ka Khasi bad Jaintia Hills ban pynbor ia ki ba kin iakren bad ka sorkar ba kan weng noh ia ka Ordinance.
U Dr Kharshiing u la ong ba ki rangbah shnong ki la pule bha ia ka Ordinanve bad ki la shem ba kam iahap satia katkum ka rirti dustur bad na kata ka daw, kim lah ban pdiang.
“Ngim iahap ia ki kyndon ba la buh ha ka Ordinance ha kaba ka sorkar ka la pyrshang ban pynbor bad teh ia ki Rangbah Shnong”, u la ong.
U president ka SKRS u la ong ba ki Rangbah Shnong kim kyrshan ia kano kano ka kynhun ne kano kano ka seng sain pyrthei.
“Ngi ieng beit ha ka nongrim jong ngi ba ngi kwah ia ka VAB. Ka dei ka jingialam bakla ia ka jingong jong ki liangpyrshah da kaba kynnoh ba ngi don ka jingiajan bad ka liang synshar ha KHADC ka PDF”, la ong u Dr Kharshiing.
U la ong ba ha ka jingialang kaba long ha ka 19 tarik Jymmang ba la wan ki MDC na liangsynshar bad liangpyrshah, la iarai lang ban dawa na ka sorkar ba kan pas noh ia ka VAB.
“Namar kane ka jingiakren bad ka jingiakut, ngi la pyrkhat ba baroh ki 30 ngut ki MDC ki la pas ia ka VAB da ka sur ka jingialong kawei hynrei kham hadien ngi tip ba ka liangpyrshah ka ARPA ka la pyrshah ia kane ka Bill”, u la ong.
“Ha ka jingshisha ha ka Dorbar Ka Bri Hyn niewtrep ha ka 30 tarik Jymmang, ngi la ioh ia ka khubor ba ka KHADC ka la pas ia ka VAB. Namar ba ngim ioh ia ka lad ban iakren, ngi shu pynbna paidbah ba ia ka VAB la pas”, la ong u president ka SKRS.
Na ka liang ki Rangbah Shnong ki kwah ia kaVAB la ka dei jong u snem 2014 ne jong u 205 kam pher. ”Ia mynta, ngim lah ban ong la ka Bill ba pas ka KHADC ka don bniat ne em. Ngin sa pule bha hadien ba la shna ia ki kyndon”, u la ong.
U la ong ba ka SKRS kan bteng ha kine ki sngi ban wan ban bduudien ia kane ka Bill ban pynbha shuh.
Phi don ban ong eiei?