Yn ap ia ka High Court ia ki Parliamentary Secy, ong ka BJP

Shillong, 27 Jylliew:
Ka BJP ka la ong ba ka jingthung kam Parliamentary secretaries jong kane ka sorkar MUA-II ba ialam ka Congress ka dei beit tang ban bat ia ki MLA ban pynneh jubor ia ka shuki, hynrei kan ap beit ia ka rai jong ka Meghalaya High Court halor kane ka kam.
“Ngin ap ia ka rai ban mih na ka High Court namar ba kane ka kam ka la don ha kti jongka”, la ong u Bah Shibun ha ka jingiakren mynta ka sngi.
U la ong ba ka jingthung Parliamentary secretaries ka dei ka jingpynlut phut ia ka kam jong u paidbah bad ka jingduh nong ka dei ia u paidbah hi.
“Ngim sngew tynnad ia ka jingleh kane ka sorkar ban pynlong langknia ia ki paidbah katba ialade ka la leh sahuh”, la ong u Bah Shibun.
Lah ban kdew ba ka kam Parliamentary secretaries ka la poi sha ka High Court ba la ujor da uwei u rangbah na Jowai bad ka Kashari ka la buh sngi ban shim bishar biang ia kane ka kam hapoh saw taiew naduh ba la shim bishar ha une u bnai.
Ka sorkar MUA-II ka la pas ia ka Ordinance ha ka dorbar ba la dep ban pynkup bor ia ki PS hynrei haduh mynta u Lat ka jylla um pat soi satia ia kane ka ordinance.
Ka jingkyntait u President ban soi ia ka Bill ki PS ha Delhi, kan sa don kumjuh ka jingktah ha kane ka jylla ha kaba u Lat ka jylla un nym soi ia ka Ordinance ka sorkar jylla.
Lada u Lat um soi ia ka Ordinance, kan don ka jingma kaba khraw ia ki MLA kiba bat kum ki Parliamentary secretaries ha kane ka sorkar MUA-II ioh kin shah trei ha ka ain mait kyrteng.