Shillong: Halor ka jingnang kiew sted biang jong ka jingpang Covid 19 ha ka jylla Meghalaya baroh kawei bad khamtam eh ha ka jingiai kiew sted eh jong ki briew kiba ia bit na ka jingpang Covid 19 ha East Khasi Hills District bad ha Ri Bhoi District; kumta na ka liang jong ka tnad pule puthi ka jylla Meghalaya ki la rai ban ailad biang ia ki khynnah skul kiba dei ban iakhun ia ka eksamin Secondary School Leaving Certificate(SSLC) bad ka Higher Secondary School Leaving Certificate(HSSLC) kiba don ia u khniang jingpang Covid 19 ba kin thoh ia ka eksamin jong ki hadien da la kut kine eksamin tang lada ki lah ban pynshisha ba ki la ioh ia kane ka jingpang da kaba ki pyni sha ki bor pyniaid skul ia ka RTPCR Certificate.
Haba iakren shaphang bad ki lad pathai khubor, u Bah Lahkmen Rymbui, u ba dei u Myntri jong ka tnad pule puthi ha ka jylla, u la ong ba ha ka jingialang kaba la long mynta ka sngi ka 9 tarik u Iaiong 2021 ki la shim ia kane ka rai hadien ba la iohi ba kane ka jingpang Covid 19 ka la sdang ban kiew biang ha kine ki khyndiat sngi kiba la dep watla ka Sorkar Jylla ka la leh katba lah ban iada bad ban bthah ia ki paidbah ba ki dei ban bud pyrkhing bha ia ki kyndon khnang ban lait na kane ka jingpang kaba la ktah shikatdei eh ia ka jylla bad ia ka pyrthei hi baroh kawei.
U Bah Lahkmen Rymbui u la ong, ” Ka jingiashong meeting jong ngi mynne ka sngi ka dei tang na ka bynta ia kane eksam ki ban long ha kine ki taiew ki ban wan ba kumno ba kin iaid bad kaei ka contigency plan kaba ngin don khnang ba ki khynnah kin nym suffer. Lada don uno uno u khynnah u ba ioh Covid, ka Sorkar ka la pynkhreh ban ailad biang ia u ha kawei pat ka por ha kawei pat ka tarik ka ban sa buh lada u lah ban pyni ia ka certificate ba u kham lah ban ialeh ia ka eksam namar ba u don postive Covid. Ngi hap ban shim ba kane kadei ka jinglong jingman kaba thymmai, ngi lah ban ong ba ka shalyntem jong ka pule puthi, ka shalyntem jong ka trei ka ktah, ka shalyntem jong ka roi ka par ka hap hi ban iaid”.
Phi don ban ong eiei?