Ym tip u myntri, ba ym bit phah pulit sha Mawlai, ha ka 12 haduh 15 Nailar

Shillong:U myntri ka tnad korbar ri ka jylla, u bah Lahkmen Rymbui, u la iathuh ba um pat ioh jingtip eiei, halor ka jingdawa jong ka Sur ka bri u Hynniewtrep, ban ym buh pahara ia ki pulit ha ka shnong Mawlai.

Lah ban kdew hangne ba ka Sur ka Bri u Hynniewtrep, ka la buh ia ka jingdawa ha khmat ka tnad pulit, ba ym dei ban phah ia ki pulit ban pahara naduh ka 12 tarik haduh ka 15 tarik u Nailar hapoh ka shnong Mawlai.

Ka jingbuh ia ka jingdawa ka long ba kane ka sngi, kan dei ka sngi ka jingdap shisnem, ka jingshah pyniap u nongialam barim ka seng kieng atiar HNLC u bah Cheristerfield Thangkhiew ha kti ki pulit hapoh ingsah jong u. Haba ia kren bad u Myntri ka tnad u bah Lahkmen Rymbui u la ong “Ngam pat don jingtip halor kata ka jingdawa, hynrei na ka liang ka District Administration bad ki tnad pulit kin shim ia ka sienjam ban pynneh ia ka shong suk shong shngain ha ka jylla baroh kawei”.

“Ki pulit hi kin sa shim ia ki sienjam kiba dei ban pynneh pynsah ia ka shong suk shong shngain ha ka jylla, na ka liang u symbud myntri rangbah ka jylla ruh, u la dep ban pynshai ia ka sienjam kaba ka sorkar kan shim ha kaba ia dei bad ka kaiphot halor ka jingjia kaba la jia ha ka 13 tarik u Nailar 2021″u la bynrap.
U bah Rymbui u la ong ruh “Ngam iohi ba kane ka mat kan lah ban ktah biang ia ka shongsuk shongshngain ha ka jylla, hynrei na ka liang ki pulit ki la shim khia ban peitngor halor kane mat”u la ong.
Ha kaba ia dei bad ka jingpynneh ia ka shong suk shong shngain, na ka bynta ka sngi ban rakhe ia ka sngi laitluid ka Ri ka ban rakhe ha ka 15 tarik mynta u bnai u bah Rymbui u la ong “Ki pulit ki la shim khia bha halor ka shongsuk shong shngain, na ka bynta ka jingrakhe ia ka sngi jinglaitluid ha ka jylla”.

Haba buh jingkylli halor ka jingshim khia ban peitngor ia ki lehnoh shitniam, u bah Lahkmen u la ong “Na ka liang ki pulit ka jylla ki la shim khia bha ban tehlakam ia ki kam pyntriem na ki kynhun lehnoh bad kumba la iohi ia ki khubor halor ka jingdon ki lehnoh Jihadi ha Assam ki pulit ka jylla ki la shim khia ban pynthikna ba kin ym ioh rung ha ka jylla Meghalaya”.

“Ki shnat syntiat (Intelligent) ki long kiba peitngor bad kaba kham donkam ka long ka jingshim khia jong ki nongshong shnong ban long kiba peit ngor kan iarap shibun ban pynneh ia ka shong suk shong shngain ha ka jylla, bad lada don kano kano ka jingujor, na ka liang ki pulit ki la shimkhia”u la bynrap.
U la ong ruh “Halor ki lehnoh Jihadi ym tang ki tnad pulit na ka jylla, hynrei ia kane la shim khia hi da ki shnat syntiat na ka sorkar pdeng ruh namar ba kane ka dei ka mat kaba ktah ia ka Ri hi baroh kawei”.