Ym tip U MDC, ba thmu pyntreikam Aadhar na Nongstoin

Shillong, 23 Naitung:
U Deputy Chairman ka KHADC uba dei u MDC shu sieh, U Bah Gabriel Wahlang u la ong ba um pat don jingtip eiei ia ka jingthmu ka sorkar ban sdang ban pyntreikam ia u Aadhar number na Nongstoin C&RD Block.
“Ngam pat tip eiei ia kane ka jingthmu, ngan hap wad jingtip shwa bad ngan sa lah ban ong eiei”, la ong u bah Wahlang ha ba twad jingmut kaei ka jingsngew jongu halor kane ka jingthmu ka sorkar ban sdang ban pyntreikam ia u Aadhar number na thain Nong stoin.
Ka tnad Census ka sorkar pdeng ka la pyn khreh shaid dhaid ban sdang biang ban pynrung ia u Adhaar nombor ne  Bopmetric  Unique Identification  ha kane ka jylla bad mynta kan sdang biang na Nongstoin Community and Rural Development Block ha u Nailar ban wan.
Ha kane ka sngi Nyngkong, u Assistant Director jong ka Census u Dr B Das Gupta, u la iathuh ba mynshwa ha u snem 2013 ki la sdang ban pyntreikam ia u Adhaar nombor ha kane ka nongbah Shillong hynrei la hap ban pynsahngeh noh shwa namar ba ki sengbhalang bad ki shnong ki ia pyrshah.
U Dr Das u la iathuh ba u DC ka Nongstoin u la ai jingtip sha ka tnad khein briew ne Census ba ka Nongstoin C &RD ka la biang nadong shadong ia ki jingdonkam ban sdang noh ia ka jingpyntreikam ia u Aadhar number.
Katkum ka jingong u Dr Das yn sdang ban leitt sha ki shnong kiba hap ha Nongstoin C &RD naduh ka ka 8 tarik Nailar 2015.
U la  ong ba ka jingpyntreikam kan shong ha ki DC ba kin ai jingtip sha ka tnad Census khnang ba kan lah ban iaid shakhmat.
U Gupta u la ong ba une u Adhaar nombor u don ka jingiadei bad ka dur thep vote ha kaba na ka liang jong ka Election Commission ka sorkar India ruh ka la don ka jingthmu ban pyniasoh noh bad  u Adhaar nombor  khnang ban lait na ka jingshah leh tuh ha ka por elekshon.
Ka jingpyntreikam ia u adhaar nombor ka long na bynta ban pynithuh ialade shimet, la ong u Dr Gupta.
Ban leh ia une u aadhar number, ki briew ki donkam ban rah ia ki dur EPIC ne ki kot reshon, ne pan card haba ki pynrung kyrteng ha kaba ki briew na ka tnad kin leit sha ki shnong.
Ka jingpynrung kyrteng aadhar number kan long naduh ki kynnah 5 snem shaneng hynrei kito kiba duna ia ka 18 snem ki bym pat don dur vote, ki lah ban rah da ki license niah kali, ki kot reshon ki kmie ki kpa bad kiwei ki kot kiba lah ban pdiang”, u la ong.