Ym tip daw, halor ka jingiap ka samla Umlyngka, ka kaiphod post mortem ha ki pulit

Shillong,18 Nailar:
Mynta ka sngi haduh 21 ngut na ka shnong Umlyngka (3 mer Upper Shillong) ki la leit ban ia kynduh ia ka myntri kam pohing ka sorkar jylla ka kong Roshan Warjri, kitei ki 21 ngut ki kynthup ia ki ba ha ing hasem, ki seng samla, ka bor shnong bad ki rangbah na katei ka shnong. Ha katei ka jingleit ia kynduh ki la kyrpad ia ka myntri ba kan shimkhia ia katei ka kam ha kaba ka la kular ruh ba na ka liang jong ka kan sa shimkhia hynrei kam pat lah pat ban ong eiei namar ba kam pat ioh ia ka ripod Post Mortem.
Ki bahaing jong ka samla kaba la iap na ka shnong Umlyngka, ki la pyntip ba ki ioh jingtip ba la dep pyllait ia ka ripod post mortem bad ki laong ba ka dang don ha kti ki pulit. Kim pat iohi ia ka ripod jong ka post mortem ka batai kumno hynrei ki la ong ba ki la ioh jingtip ba la kdew ba ym shym lah ban batai ia ka daw ka jingiap jong katei ka samla.
Kiwei pat ki lad khubor ki la iathuh ba ka Post Mortem kam pyni dak eiei shuh namar ba ka la metiap ka la pyut palat bad kaba sah mynta ka long ba ki pulit kin leh exhumination ne da kiwei pat ki lad. Lah ban pynkynmaw ba h aka 24 tarik u naitung katei ka samla ka la jah na la ing bad la lap ia ka ha ka 29 tarik u naitung na Wah Umiam.