Ym thikna ka sorkar, ban pynkhie im khalai nusip

Shillong, 4 Iaiong:
Ka sorkar jylla kam pat pyrkhat eiei ban pyn khie im biang ne em ia ka khalai nusip ne online lottery ha ka jylla.
Ka thymmei khubor ha kane ka sngi Thoh dieng ka la ong ba ka sorkar ka dang thiah thai halor kane ha kaba kam pat lah ban shim rai eiei.
“Ka sorkar ka dang wad ia ki lad ki lynti ba thymmai hadien shiphew snem ba la iasoi bad ka MS Associates ban pyn treikam ia ka khalai nusip ne online lottery ha ka jylla ha ka 22 tarik Nailar, 2012. Ka sorkar mynta ka hap ban iaid suki ia kane ka kam”, la ong u heh sorkar.
Da ka jingduhnong namar ka jingbym biang ka rukom pyniaid ia ka khalai nusip mynshwa, u heh sorkar u la ong ba ka sorkar ka dei ban shim ia ki lad ki lynti ba biang shwa ban pynkhie im biang ia ka khalai nusip.
Ha u snem 2001, ka sorkar ka la iasoi bad ka MS Associates ba kan pyniaid ia ka khalai nusip ha kaba kan hap ban siew T. 3 klur sha ka sorkar ha ka snem ba nyngkong. Hynrei hadien ba la pyr shah na ki paidbah, ka sorkar ha u 2002 ka la pynkylla ia ka jingiasoi bad ka kompeni kaba hap ban siew haduh T.12 klur ha ka shi snem bad kan pyn iakhalai 4,000 tylli ha ka shi snem.
Ha u Risaw, 2004 ka MS associates ka la ong ia ka sorkar jylla ba kan pynrit ia ka jingsiew na ka T. 12 klur sha ka T. 6 klur ha ka shi snem. Kham hadien ha u snem 2005, ka kompeni ka la sangeh noh ban pyniaid ia ka khalai. Katkum ka kaiphod u CAG, ha kine ki saw snem naduh 2002 haduh 2005, ka kompeni ka hap ban siew T. 54.08 klur katkum ka jingiateh bad ka sorkar Meghalaya. Hynrei ka siew tang T. 19 klur bad ka sah ban siew sa T. 35.08

klur.