Shillong:U MLA jong Voice of The People Party (VPP) na North Shillong Konstitwensi u bah Adelbert Nongrum u la ai por ia ka sorkar jylla ba kan pynkynriah noh ia kito ki briew kiba sah ha Themetor bad u la ai ruh ka por ba khatduh ban pynkynriah ka dei ha ka 12 tarik Jymmang 2023.
U bah Adelbert Nongrum, u la pynpaw ruh ia ka jing bym sngewhun haba iadei bad ka jing pyniaid jong ka sorkar ia kane ka kam bad u la iathuh ruh ba u don ka jing thmu ban leit kynduh ia u symbud myntri rangbah jong ka sorkar jylla u bah Prestone Tynsong, ha ka sngi ai por ba khatduh.
Ka jing pyrshah kam dei satia ban pyrshah ia kano kano ka imlang sahlang, hynrei ka dei ia ki polisi treikam jong ka sorkar ka bym shem la lah ban leh eiei ia ki nongtrei la jong.
U la dawa ruh ba ka sorkar jylla ka dei ban leh da kaba tyngeh ban pynkynriah noh ia kitei ki nongtrei na katei ka jaka bad ki dei ruh ban kohnguh ia ka hukum jong ka sorkar.
Ka jingkhang ban iaid ki kali na kitei ki surok ba leit sha ka jaka sah jong kitei ki briew, ka dei kawei kaba ktah bha ia ka jing sahkut jong ka iaid ka ïeng ha shillong bad u sngewkhia ruh ia ka koit ka khiah jong ki nong shong shnong, ha katei ka jaka.
U la bthah ruh ba ka jaka pynieng kali ne ka multi purpose cum parking la dei ban tei ha katei ka jaka.
Ka long ka bym sngew shongdor eiei ruh em ba ka Harijan Panchayat Commitee (HPC), kan kyntait ia ka jingtyrwa jong ka sorkar ban pynkynriah ia ki 342 tylli ki longïing sha ka jaka ba don ka ophis treikam jong ka Shillong Municipal Board (SMB).
Katba u symbud myntri rangbah jong ka jylla pat u bah Prestone Tynsong, u la iathuh ba ka jing pynkynriah ia ki briew kiba shong ba sah ha them metor, ka dei beit ban urlong.
Phi don ban ong eiei?