Nongpoh: U Bah Lambor Malngiang, MLA ka Nongkrem bad uba dei ruh u Chairman ka Meghalaya State Planning Board, u la pynpaw ba kumba ka long mynta hapoh ka jylla, ym pat long ban mynjur ia kata ka Inter-state Movement ne ka jingiarung iamih ki briew na kawei sha kawei pat ka jylla, hynrei ka jylla Meghalaya hi ka dang donkam ban teh pyrkhing ia ka jingwan rung ki briew nabar, ha kaba kum kane ka por ba dang jur bha ka jingsaphriang ka khlam Covid-19.
Haba kren halor ka jingsngew jong u ba um pat sngew iahap ban mynjur ia katei ka jingbthah da ka sorkar pdeng ban ailad noh ia ka rung ka mih hapdeng ki briew na kawei sha kawei pat ka jylla ( Inter-state Movement), u Bah Lambor Malngiang, u la ong ba lada ailad ba ki briew nabar ki rung ha kaba kum kane ka por, kan sa wanrah ia ka jingma kaba khraw ia ki paid Khasi kiba sah hapoh ka Bri u Hynniewtrep, uba don tang shitroh eh haba ianujor bad ka jingdon kiwei pat ki jaidbynriew heh paid hapoh ka Ri. Ban iada ia ki paid hapoh ka Ri Khasi, ia kaba mynta hi ym pat long ban mynjur ia kaei kaba la bthah jong ka sorkar pdeng, bynrap shuh shuh u Bah Lambor Malngiang.
Ha kaba u la ong ruh ba kum u briew uba don ia ka jingbahkhlieh na bynta ki paid hapoh ka Bri u Hynniewtrep, u tieng ioh ban ka jaid bynriew kan shah tyllep na ka jingwan ki briew nabar bad katno tam ha kaba kum kane ka por hapdeng ba ka khlam Covid-19 ka sar naphang ha kylleng ki jylla hapoh ka Ri. Halor katei ka jingbym iahap jong u ban mynjur ia kaba la bthah da ka sorkar pdeng, u Bah Lambor Malngiang, u la ong ba un sa iakren sha ka sorkar, ba la kumno kumno ruh bad ia kaei kaba jia mynta, dei ban pyrkhing beit halor ka jingwan ki briew nabar.
Katei ka jingkren u Bah Lambor Malngiang, ka dei ha ka sngi kaba u hiar ban jurip ia ka Screening Centre ha Byrnihat, kaba ma u lem bad ki dkhot na ka Meghalaya state planning board, ki la leit ban ai mynsiem ia kiba trei hapoh katei ka Centre bad ha kajuh ruh ka por ban tip halor ki rukom treikam ha katei ka Screening Centre.
Phi don ban ong eiei?