Shillong: U chairman ka Steering Committee jong ki dorbar kur, u bah Khrawbuit Ryntathiang u la ong ba kane ka Committee kam shym la pyrshah ia ka Khasi Social Custom Lineage (KSCL) Bill 2018, hynrei ka kwah ban ai jingmut halor ki katto katne ki kyndon kiba lah ban ktah ia ka jaitbynriew.
U Bah Khrawbuit u la ong ba ka jingialang jong ki kur kaba long ha kane ka sngi Saitjain ka la don kumba 50 tylli ki jait kur kiba la thaw ia kane ka Steering committee ban ai jingmut ia ka KHADC halor kane ka KSCL.
“Kumba 50 tylli eiei ki jait kur kiba la wan sha ka jingialang’, la ong u Bah Khrawbuit haba kren bad u Rupang myn hynnin ka sngi.
U la kren shai ba ka jingmut kam dei ban pyrshah ia ka KSCL Bill hynrei ki kwah ban ai jingmut halor ki katto katne ki bynta kiba lah ban ktah ia ka jaitbynriew.
“Ngin sa iashong jingialang da ka Steering committee, ha kaba ngin sa leit ai jingthoh sha ka District Council Affairs shen”, u la ong.
U la ong ba u la iohi ia ka jingpynsngew ki jingthoh ha ki social media ia ka jingkynthoh pyrshah, hynrei yn sa pynshai ha kine ki sngi khnang ba kin sngewthuh kham bha.
“Ngin sa pynshai hadien ba kin sngewthuh ia kaei kaba ngi ieng bad kin sa pykhat hadien ynda ngi la pynshai. Ngim pyrshah ia ka Bill hynrei tang ki katto katne”, la ong u Bah Khrawbuit.
U la ong ba ka KSCL ka KHADC ka leh ia ka bynta jongka hynrei ka donkam ban pyrkhat kham bha ia kane ka kam bah kam san.
“Ngim kwah ba ki kur ki jait ban ioh dkhar bad ka donkam ban pynbeit ban kham pynjanai ban khang lad ia ka jingshong khleh. Ngin hap phai sha lade ioh ba ngi synjor palat pynban na ka longing jong ngi”, la ong u bah Khrawbuit.