Ym pynshlur ne beh ia kiwei, ban shim bynta ha ka Shad, ong ka Seng Khasi Laitkor

Shillong:Wat la ka Seng Khasi Laitkor Pyllun ka seng nongrim ban lum ban lang ban kyntiew ia ka niam tynrai katkum ka riti dustur Khasi, hynrei kam pynshlur ne beh ia kiba la kylla niam sha kiwei ki jingngeit ban wan iashim bynta ha ka shad.

Ka Shad Suk Mynsiem ka Seng Khasi Laitkor Pyllun, ka la kut mynta ka sngi ha madan shad ha Laitkor ha kaba da ki spah ngut ki nongshad kynthei bad shynrang ki la wan ban iashim bynta shitrhem.

Haba iakren bad u Vice President ka Seng Khasi Laitkor Pyllun u bah Throshon Mylliemngap, u la ong, “Wat la kam don ban pynshlur ne ban beh ia kiba kylla niam ban iashim bynta ha ka shad hynrei ka jingmut ka long ban shim ban kdup ia kiba don ha ka niam tynrai katkum ka riti dustur hynrei lada ki wan ban shu leh tang ban tynneng ban pyrthuh bud, ia kata ngim mon hynrei wat la kiba don ka mynsiem iatip lem kiba kwah, ngim banse ban pdiang ia kum kita namar ba ki khihwin tang mar ia riew ka sting ka dhah”.

Ka Seng Khasi Laitkor kan dap pura ruh 50 snem lashem snem ban rakhe ia ka jubili ksiar hadien ba la seng ha ka 28 tarik Jymmang 1974.
U Bah Throshon u la ong ba kane ka shad kam dei kaba dang shu sdang dang shen hynrei ka dei naduh u snem 2007, ban ai nguh ia u Blei Nongthaw Nongbuh, ban kyrkhu kyrdoh ia ki snem ba la leit bad kiban dang wan na bynta ka rep ka riang, ka koit ka khiah ban khiah krat khiah stang.

U la ong ba ka Seng Khasi Laitkor Pyllun ka dei ka nongkyrshan ba radbah ia ka Seng Khasi Kmie naduh ki snem mynshwa. Wat la la seng naduh kham mynshwa, hynrei ha kitei ki snem khlem pyllong ia ka shad ka kmen bad dei ha u snem 2007 ka la sdang ban pyllong ia ka shad suk mynsiem ba nyngkong.

“Ka jingpyrkhat ban pyllong ia ka shad ka dei ha u snem 2004 bad dei halor kane ba la rai ban iaid shakhmat ban pyllong ia ka jingshad ha u snem 2007 bad ki wan iashim bynta 104 ngut ki nongshad kynthei bad shynrang. Ka jingthmu ka long ban lum ban lang ia ki para riew seng hynrei hadien ba la ioh jingtip, la wan ban iashim ki nongshad na kiwei kiwei ki shnong”, la bynrap u bah Throshon.