Shillong: Ka jingiawad kyrtong monlang jong ka kynhun synrop ka MDA ka dang iaid haduh mynta bad haduh mynta ki dang don dang 2 ngut ki kyrtong kiba la shah tyrwa ha ka MDA ban long kum u kyrtong monlang bad kitei ki dei u bah Jemino Mawthoh na ka UDP bad u bah Renikton Lyngdoh Tongkhar na ka HSPDP.
Ka NPP ka dei ka seng kaba ialam ia ka kynhun sorkar synrop jong ka MDA mynta ha ka jylla, hynrei haduh mynta katei ka seng ka dang sngap jar jar bad ym pat tip iano kan tyrwa ha ka MDA ban long kum u kyrtong monlang. Ha kine ki sngi ki khubor ki saphriang bha ba u CEM ka KHADC u bah H.S Shylla un iakhun ia ka elekshon MP.
Hynrei ha ka jingiakren bad u Shylla u MDC jong ka NPP u la ong ba haduh mynta kam shym la don kano kano ka jingiakren hapdeng jong u bad ka Party kaba u don ka NPP na ka bynta ka elekshon MP. Haba kylli u bah Shylla u la ong ba kam shym la don kano kano ka jingkhot jingiakren hapoh ka Party NPP na ka bynta u kyrtong monlang ha ka elekshon MP na Shillong Parliamentary Seat.
Ha ka jingiakynduh bad ki nongthohkhubor mynhynnin ka sngi, u bah Shylla u la ong ba ka NPP kam shym la ia syllok eiei bad u halor ka elekshon MP bad kumba ka long haduh mynta um pat tip eiei kaei ka jingmut jong ka NPP ia ka elekshon MP.