Ym pat treh kren ka HSPDP, halor U Bah Nongsiej bad Mawsor

Shillong, 22 Nohprah:
Ka HSPDP kam kwah ban kren eiei halor ka jingpan jingshai na ki ar ngut ki MDC u Bah LG Nongsiej bad u Bah Morningstar Mawsor kiba leit kyrshan sha ka People Democratic Forum (PDF) ha KHADC hapoh ka jingialam u Bah Pynshngain N Syiem kum u CEM.
Ha ka jingshisha ka por ba ka party ka la buh ba kin ai jubab bad ban panmap hapoh shiphew sngi ka la dep kut hynrei haduh mynta ka party kam kwah ban ong eiei halor kane ka kam.
“Ngim pat lah ban ong eiei halor kane ia mynta”, la ong u Bah Witting Mawsor haba kylli kaei ka sienjam ba ka party ka la leh na ka bynta kine ki ar ngut ki MDC kiba ka party ka la pan jingshai na ki.
Ka HSPDP kham mynshwa, ka la byrthen ba kan pynngat da ka jingpynshitom kaba tyngeh ia kine ki ar ngut ki MDC namar ba ki leit kyrshan ia ka kynhun PDF khlem ka jingtip ka party.
Hynrei ha kawei ka liang, ki nongkitkam na ki tnad bapher bapher ka HSPDP na Nongstoin konstitwensi ki la  ai ia ka jingkyrshan ba tyngeh ia u MDC jongki u Bah LG Nongsiej uba la shah kynnoh ha u president ka seng u bah Ardent M Basaiawmoit ba um kyrshan ia u kyrtong ka HSPDP ha kane ka elekshon shiteng samoi ba la dep .
Ki la ther ba ka jingkynnoh jong u Bah Ardent ka dei kaba bakla bad ka bym shisha haei haei ruh namar ba u bah Nongsiej u leit sha man ki shnong ban ialap ban kyrshan ia u kyrtong ka HSPDP, ym ban kyrshan ia u kyrtong ka Congress kumba la kynnoh u Bah Ardent.
Ki la rai  ban ai ia ka jingkyrshan ba radbah ia u MDC Bah LG Nongsieh bad ia u Bah Morningstar Mawsor kiba leit ban kyrshan ia ka kynhun PDF hapoh ka jingialam jong u Bah Pynshngain N Syiem kum u CEM halor ki mat ba u ieng pyrshah ia ka sorkar jylla kaba thmu ban iuhroit ia ka hok jong ki rangbah shnong bad ban pyniaid jubor ia ka MUDA shabar ka Municipal.
Lah ban kdew ba ka HSPDP ha ka jingialang jongka ha kane ka sngi dang shen ka la ai por 10 sngi ia u Bah LG Nongsiej bad u Bah Morning Mawsor ba kin weng noh ia ka jingkyrshan na ka PDF hapoh 10 sngi bad ba ki dei ban panmap, lym kumta kin shah pynher krad na ka party.