Ym pat tip U VC, ba ki Principal, kim treh pyntreikam ia ka NEP

Shillong:U Vice Chancellor ka North Eastern Hills University u Prof. PS Shukla, u la kam ba haduh mynta um pat ioh jingthoh eiei na ki Principal, ba kim treh ban pyntreikam ia ka New Education Policy 2020 kumba la rai ka NEHU.

Haba kren mynhynnin ka sngi, u la ong ba baroh ki samla pule, ki Principal jong ki college, ki la mynjur lait noh tang uwei ne ar ki kynhun ha kaba ula iakynduh ia ki kynthup ka HYC, FKJGP, NEHUSU bad baroh la pynsngewthuh halor ka jingdonkam ban pyntreikam ia ka NEP 2020. “Haduh mynta ngam pat ioh pdiang kano kano ka jingthoh na kino kino ki Principal ba kim treh ban pyntreikam ia ka NEP 2020”, la kam u VC ka NEHU.

Halor ka jingpyrshah ka Meghalaya College Teachers Association u Vice Chancellor, u la ong ba um lah ban khot iakren ia ki, hynrei lada ki wan ban iakren u pdiang sngewbha bad u la kyntait ban kren eiei halor ka jingkynnoh ka MCTA.
“Ngam kwah ban kren eiei halor ka jingpyrshah ka MCTA, ngam lah ban khot iakren ia ki hynrei lada ki wan ban iakren, nga long uba la pynkhreh ban iakren”, la ong u Prof. Shukla.

Lah ban kdew ba ka NEHU ka la pynmih ia ka jingpynbna ban pyntreikam noh ia ka NEP 2020 naduh ka 1 tarik Nailar 2023 kaba la wanrah ia ka jingpyrshah na ka MCTA hynrei kiba bun ki college kila iaid shakhmat ban pyntreikam ia kane ka polisi thymmai halor ka pule puthi.
Shwa ia kane, u VC u la ong ba ka NEHU ka ai lad shi snem ia kito ki College lada ki shem ba kim pat lah ban pyntreikam mynta u snem ia ka NEP.

Ha kawei ka liang, u la iathuh ba ka North Eastern Hills University (NEHU) kan pynlong ia ka jingpynrung kam hashen ha phyllaw ka NEHU ia ki samla pule kiba la kot katkum ki jingdonkam jong ki kompeni bapher bapher.
U la ong ba ki kompeni kiba nabar bad kiba don hangne kin wan ban pynrung kam ia ki samla kaba dei shi bynta ka Rozger mela bad kane ka dei tang ka jingsdang bad yn bteng ha ki sngi ban wan.
U Chancellor u la ong ba kino kino ki samla pule ki lah ban wan ban pyrshang ha kane ka iew jingpynrungkam ha kaba ki kompeni bapher bapher kin wan ban thungkam ia ki samla kiba la biang ka jingdonkam.