Ym pat thikna, u myntri poh iing, ia ka jingkam ka HNLC, halor ka jingbthei ha Star Cement

Shillong: Hadien ba ka seng kieng atiar HNLC, ka la pynbna ba ka la donkti ha ka sien ba ar ha ka ban pynbthei ia u bom IED ha Star Cement; na ka liang u Myntri ka kam pohïing, u bah Lakmen Rymbui u la ong ban um pat thikna ba ka dei ka sengkaikhlaw HNLC kaba donkti shisha, hynrei kat kiba kam halor kane, na ka liang ka tnad pulit, kin wad ia kine ki briew khnang ban pynngat ia ki hapoh ka aiñ, bad ban tehlakam ia kum kine ki jingjia.

U la ong ba ïa mynta, ia ka seng HNLC la kheiñ kum ka seng beaiñ, bad na ka liang ki pulit ki dang thwet ban lap ia kine ki runar. U la ong ruh ba kiba kam ki dei ki seng beaiñ bad kum ka seng beaiñ, ka dei ka kamram jong ka Jylla ban tuklar halor kane bad ban pwit ba kum kine ki kam, kan nym jia shuh.

“Na ka liang jong nga, ngam tip kaei ba ka HNLC ka kwah bad kaei kam kwah. Lada ki kwah ban iakren, nga don hangne ban iakren bad ki ha kano kano ka rukom ban tip ia kaei kaba ki kwah bad kaei ba kim kwah bad lada ki kwah ban iakren daka jingsuk, kim dei ban leh da ka kam pyntriem,” u la ong.

Shuh shuh u la ong, “Ngi la iohi ba ia ki runar kiba donkti ban pynbthei ia u bom IED ha Shallang kiba shah kem ki dei kiba iarap ia ka seng HNLC, bad ia kine ki runar, ka aiñ kan sa shimkhia halor kane. Lada kino kino ki paidbah ki shah byrngem, ki dei ban ujor sha ki pulit bad ki pulit kin nym pynpaw kyrteng jong ki.”

Haba kylli la kane ka jingjia ba ar kaba la kam da ka HNLC ba ka donkti, la ka dei ka jingdkoh ka rukom treikam ki pulit, u Ma Lakmen u la iathuh ba kane kam dei ka jingdkoh jong ki pulit, hynrei kino kino ki jingtip kiba la ioh, teng teng lada ym don ia ka sabut kaba biang, ym lah ban leh eiei; hynrei kine ki jingjia ki pynlong ia ka tnad pulit ba nangne shakhmat ka dei ban shimkhia bad kino kino ki briew kiba donkti bad kino kino ki seng pyntriem, yn pynngat ha ka aiñ khnang ba kine ki jingjia kin nym jia shuh.
U myntri, ula pynbud da kaba ong ba ka jingkhang jong ka sorkar ka plie na ka bynta ka jingiakren, bad haduh mynta ym pat ioh ia ka shithi na ka HNLC ban iakren halor ka jingkwah ka jong ki, bad u la ong ba ynda la ioh ia ka shithi ne kino ki khubor na ka HNLC, ka sorkar kan sa shim ia ka lynti kaba biang ban ioh ban iakren bad ka seng HNLC ban wan noh sha ka jingiakren iasuk.