Ym pat rai ka KHUDA, ban pynieng CEM

Shillong, 3 Risaw:
Ka kynhun ka Khasi Hills United Democratic Alliance (KHUDA) ba ialam da ka Congress ha KHADC kam pat shim kano kano ka rai ban pyniakhun na ka bynta ka shuki CEM ba la buh ban long ha ka 8 tarik Risaw pyrshah ia ka All Regional Parties Alliance (ARPA).
Na ka liang ka ARPA ka la pynieng ia u MDC ka KHNAM na Jaiaw u Bah Adelbert Nongrum hadien ba la iehnoh u Bah Ardent M Basaiawmoit na ka kam CEM uba dei na ka HSPDP.
Haba iakren bad u MDC ka Congress, u Bah Jansing Tynsong u la iathuh ba haduh mynta ka KHUDA kam pat rai iano ban pynieng ha kane ka kynti namar ba kan sa shong ia ka jingialang shen ha kine ki sngi. “Ngim pat rai iano ban pynieng ban iakhun ia ka shuki CEM hynrei ngi dang iakren iasyllok halor kane”, la ong u Bah Tynsong.
U la ong bynrap, ba ka KHUDA kan sa shong jingialang ha kine ki sngi shwa katei ka sngi ban iatynjuh bor bad lada ka ioh ia ki number jong ki MDC ban jop, kan sa pynieng ia u kyrteng ban iakhun ia katei ka shuki hynrei lada kam sngew ioh ia ka jingbun paid, ka lah ban nym pynieng kyrtong satia hynrei kan aiti suk sha ka ARPA.
“Lada ngi ioh ia ka jingbun paidbah, ngi lah ban pynieng ia u kyrtong CEM hynrei lada ngim lah ban ioh ngi lah ban shu kyrshan ia u kyrtong ka ARPA ban iatreilang”, la ong u Bah Tynsong.
Halor ka jingkylli, ba la don ka jingiakren ba ka KHUDA kan pynieng biang ia u CEM barim u Bah Pynshngain Syiem, na ka liang u MDC ka Lyngkyrdem, u la ong ba haduh mynta kam pat don ka jingiakren ha ka party iano bad mano ban iakhun ia katei ka shuki CEM.
Ka KHUDA ka don 14 ngut ki MDC kynthup 12 ngut na ka Congress, 1 indepdent, 1 wei NCP katba ka ARPA ka don 17 ngut kynthup 6 ngut ka UDP, 6 ka HSPDP, 4 ka KHNAM bad kawei ka independent ka Kong Grace M Kharpuri kaba la iehnoh dang shen na ka party HSPDP.
Ha kawei ka khubor, la iathuh ba ka don ka khubor kaba iakren sharum shaneng ba ki don katto katne ngut ki MDC na ka ARPA kiba la leit pasiaw ban kyrshan ia ka KHUDA bad lada ka long kaba shisha, ka ARPA ka lah ban khyllem ha ka jingiatynjuh bor kaban long ha ka 8 tarik ban wan.
Ka huri hura ka ARPA ka la mih hadien ba ka UDP ka la dawa bad pyneh beit triang ban bujli noh ha jaka jong u Bah Ardent namar ki kam leh hi jongu ia ki kam jong ka Council. Ka HSPDP ka la mad ia u soh kthang hadien ba ka MDC na Nongshken ka Kong Kharpuri ka la iehnoh na ka party hadien ba kam lah ban iapyniahap bad ki katto katne ngut ki para MDC kane ka party.