Ym pat rai ka KHNAM, HSPDP ia u Bah Paul, halor ka MP

Shillong, 8 Lber:
Ka KHNAM bad ka HSPDP kim pat lah ban rai, la kin pdiang ne em, ia U Bah Paul Lyngdoh, uba dei u kandidet ka UDP, na ka bynta, ban pynieng na ka bynta ka MP elek shon sha ka Lok Sabha.
Ka UDP ha ka jingia lang myn ha ka sngi thohdieng ka la phah sha ka HSPDP bad ka KHNAM, la ki la pdiang ne em ia u Bah Paul kum u kyrtong mon lang ha kane ka elekson MP.
Hynrei haba kren hynnin, ka sngi ha ka jing shah jied kum u CEM ka KHADC u Bah Ardent Miller Basaiawmoit u la ong ba na ka liang jong ki ruh kin phah ia ka kyrteng jong u kyrtong jong ki ba ki la rai, hynrei kan shong ha ka jingia rai lang iano yn pynieng.
Kham mynshwa ka HSPDP bad ka KHNAM ki la rai ban kyrshan ia u Rev PBM Basaiawmoit ha kane ka elekshon MP.
U Bah Ardent u la ong, hynrei ha ka sain pyrthei ka lah ban don ka jingkylla ha kaba kin sa shong pyrkhat bad kin sa ai ia ka rai ha kine ki sngi.
Ha kawei ka liang, ka thymmei khubor kaba la ioh na ka KHNAM, ka la pynpaw ba kam kwah ia u Bah Paul bad ki kwah ban wad da uwei pat u kyrtong ban long u kyrtong monlang na bynta kane ka elekshon MP.
U Bah Ardent u la ong ba ka HSPDP kan tyrwa da uwei u kyrtong, hynrei kan nym pynbor bad kan shong ha ka jingiarai lang jong ka ARPA.
“Haduh mynta ki dak ki shin ki biang hynrei kin sa ai ia ka rai ha kine ki shi sngi ar sngi”, la ong u Bah Ardent.