Ym pat pynbna kyrtong ka UDP, ym pat rai ka Congress Kyrshan ka HSPDP ia u Pastor Basaiawmoit na bynta ka 2014

Shillong,15 Risaw:
Ka elekshon MP Lok Sabha ka la ha jan eh, ki seng sain pyrthei haduh mynta kim pat shym la pynbna ia ki kyrtong jong ki, ki ban ia aireng hakatei ka elekshon Ing dorbar thawian ka ri. Ka HSPDP ka la pynthikna ba kan ym buh kyrtong ha katei ka elekshon MP ka ban long ha u 2014, hynrei ka la pynbna ba kan ai ka jingkyrshan kaba radbah ia u kyrtong barim ka seng u Pastor PBM Basaiawmoit uban ia khun mynta ym kum u kyrtong ka HSPDP hynrei kum u kyrtong paidbah uba ki paidbah ki pynieng ia u ym na kano kano ka seng sain pyrthei hynrei kan long beit kum u kyrtong ki paidbah. Ka HSPDP haba pynbna ia katei ka rai ban ym buh kyrtong ha ka lekshon MP, ka la kyntu ruh ia kiwei pat ki seng riewlum ba kin bud ia ka nuksa jong ka ban ym buh kyrtong ha katei ka elekshon hynrei ban ai ka jingkyrshan ia u Pastor Basaiawmoit u kyrtong paidbah.
Halor katei ka jingpynbna kaba la mih na ka liang ka HSPDP, la wad jingtip pat sa na ka UDP kawei na ki seng riewlum kaba lamkhmat ia ka liang pyrshah ha Ing dorbar thaw-ain ka jylla hato katei ka seng kan buh kyrtong ne-em ha katei ka elekshon MP ka ban wan hynrei haba ia kren bad katto katne ki nongialam katei ka seng la sngewthuh ba ka UDP kan ym ai ka jingkyrshan ia u pastor Basaiawmoit hynrei ka la ong ba ka ruh ka don la u jong u kyrtong u ba ka seng ka la ibit ban pynieng.
Katba haba phai pat sha ka liang ka seng Congress ka seng kaba don ia u MP ba mynta, la iohi ba ki la don haduh saw ngut ki kyrtong kiba la aplai tiket na katei ka seng haduh ba kam lah ban ai ka rai sha uno u kyrtong kan ai ia ka tiket bad ka rai ba khadduh la hap ban phah sha ka AICC sha Delhi.
Lah ban pynkynmaw hangne ba ha ka elekshon MP Lok Sabha kaba la dep ha u 2009, u pastor Basaiawmoit u la iakhun na ka HSPDP katba u Bah john Kharshiing u la ia khun na ka UDP bad na ka seng Congress kaba la jop ha katei ka elekshon la ia khun da u Ma Vincent pala uba long ruh u MP ba mynta na Shillong parliamentary Seat. Kumba la paw kyrteng mynta ki la don haduh 4 ngut ki kyrtong kiba la pan tiket na ka seng Congress kata u Ma Vincent Pala MP ba mynta , u Ma O L Nongtdu, bah Charles Pyngrope Lamphang barim ka ing dorbar thaw-ain ka jylla bad u Bah john F Kharshiing u kyrtong ba la iakhun teng ha ka elekshon MP na ka seng UDP.