Ym pat pynbna ia ka Committee Rangbah Shnong:HDR

Shillong, 19 Lber:
U Myntri ka tnad district council ka jylla u Bah HDR Lyngdoh u la ong ba ka sorkar kam pat pynmih ia ka jingpynbna ia ka Committee Rangbah Shnong kaba la rai da ka jingialang ba la khot da u Myntri Rangbah dang shen halor ka rai jong ka Meghalaya High Court. Haba jubab mynta ka sngi, hapoh ka iing dorbar thawain halor ka mat ba la wanrah da u MLA ka Nongthymmai u Dr Jemi no Mawthoh, u Bah HDR Lyngdoh u la ong ba ha ka jingshisha ka sorkar ka la dep pynkhreh ia ki kyndon jong kane ka komiti rangbah shnong kaba la khlieh da u Bah DD Lapang hynrei kam pynmih ia ka jingpynbna halor kane. “Ka sorkar kan sa pynmih ia ka jingpynbna shen halor kane”, la ong u Bah HDR Lyngdoh.
U la ong ba ka sorkar jylla ka la shim khia bha hadien ba la mih ka rai jong ka High Court ka Meghalaya ban sloit ia ka bor jong ki rangbah shnong bad namarkata, u Myntri Rangbah u la lum ia ka jingialang ia baroh ki khlieh nongsynshar, ki CEM, ki seng sain pyrthei ban iakren ia kane ka kam kumno ban pynskhem ia ki dorbar shnong ha ka rukom ban ithuh da ka ain.
Ha kajuh ka por, u Bah HDR Lyngdoh u la ong ba ka sorkar kan sa phah noh sha u Lat ka jylla ia ka Village Administration Bill ka KHADC kaba la thaw na ka bynta ka bor bad ka iktiar jong ki rangbah shnong.
U la iathuh ruh ba ka sorkar kan nym tuklar ia ki kam jong ki district council katkum ba la pynkup bor da ka sixth scheduled ka riti synshar ka ri.