Ym pat phah ka KHADC, ban ioh ia ka T. 267 klur

Shillong, 25 Nailar:
Ka State Level Committee (SLC) ba khlieh da u Chief secretary u KS Kropha hynne ka sngi ka la pdiang ia ki projek ba la phah da ka Garo Hills Autonomous District Council (GHADC) na ka bynta ban ioh ia ka pisa T.100.71 klur ba la ai kyrpang da ka sorkar jong u Narendra Modi. Hynrei ki projek ba la phah da ka Jaintia Hills Autonomous District Council (JHADC) ki la shah kyntait namar ba kim biang ka jingpynkhreh bad ka hap ban phah biang.
Ka Khasi Hills Autonomous District Council (KHADC) pat kam pat phah satia ia ki projek haduh mynta.
“Ka sorkar ka la pdiang ia ka jingtyrwa ba la phah da ka GHADC”, la ong u Kropha bad bynrap, katba ka jingtyrwa ba la phah da ka JHADC ym pat pdiang namar ba kam pat biang.
“Ka KHADC kam pat phah ia ki jingtyrwa jongka”, la ong u Kropha.
Katkum ka jingong u Chief secretary ka SLC kan sa shong jingialang biang ha ka 16 tarik Nailur ban pynbit pynbiang baroh.
Ka kynhun jong ki nongialam ka GHADC hapoh ka jingialam u Deputy Chief Executive Member u Agustine R Marak ki la iakynduh ia ki heh ka sorkar jylla hynne ka sngi.
Ka sorkar pdeng lyngba ka NITI Aayog ka la mang T. 267.4 klur kynthup T.133 klur ia ka KHADC, T.100.71 klur ia ka GHADC badT. 33.57 klur ia ka JHADC ba kin pyndonkam ia ki kam pynroi.
Ka la bthah ia ka Autonomous District Council ban phah noh ia ka Utilization Certificate (UC) ha u bnai Risaw mynta u snem.
Katkum kane ka kyndon ba la phah da ka NITI Aayog ha ka 10 tarik Jylliew, u Dr Mukul u la sei ba katkum ka kyndon ba la pruid dak,ka sorkar ka dei ban thung ia ka State Level Committee (SLC) ban khlieh da u Chief Secretary bad ka District Level Committee (DLC) ban khlieh da u CEM jong ki District Council ban pynkhreh ia ki skhim katkum ka pisa ba la ai da ka sorkar pdeng.
Ki Autonomous District Council (ADC) kin hap thaw ia ka DLC ban phah ia ki projek sha ka SLC bad ia kine dei ban phah sha kasorkar pdeng bad kim lah ban iaid lait na ki MLA jong ka konstititwensi bad u MP hynrei ki dei ban iasyllok lang bad ki haba ki pynkhreh ia kaprojek.